Локомтившілер жеңіске жетті
Атырау облысы бойынша меншікті тілші
«Казпрофтранс 2021» Темір жол футбол лигасы Кубогының» іріктеу ойындары өңірде өз жалғасын тауып жатыр. Маусым айында басталған аудандық тораптардағы ойындар аяқталып, жуырда Атырау қаласындағы темір жол мекемелері арасында сайыс өтті. Турнирге алты команда: Атырау жүк тасымалы бөлімшесі, Атырау вагон депосы, Атырау локомотив депосы, «Транстелеком» АҚ, Атырау байланыс және сигнализация дистанциясы және «Локомотив» футбол командалары қатысып, өзара сайысқа түсті. Атырау жүк тасымалы кәсіподақ ұйымының спорт жөніндегі нұсқаушысы Ринат Иманғазиевтің айтуынша, командалардың бәрі де жарысқа үлкен дайындықпен келген. Алты команда екі топқа бөлініп, әуелі бірінші, сонан соң екінші топтағылар ойыны басталды. Ә дегеннен-ақ Атырау локомотив депосының ойыншылары ерекше қарқын танытып, қарсыластарын тұқыртып тастады. Қалай дегенмен де футзалдан Қазақстан әуесқой командалары арасында өткен жарыстарда өнер көрсетіп жүрген олар кәнігі кәсіпқойларша шебер ойын өрнегін көрсетіп, үйіріп ала кеткені белгілі болды. Бірақ басқа командалар да есе жібермеуге жан салып, намысты қолдан бермеуге тырысты. Ойыншылар таластартыста қызу додаға түсіп, өте тамаша ойын көрсетіп, пандемияға байланысты жанкүйерлердің болмағаны ғана әттеген ай дегізді. Ойын қорытындысы бойынша, әрине әу бастан жеке дара шапқан Атырау локомотив депосының командасы 1-ші орынды жеңіп алды. Машинистердің көп болуына орай олардан екі команда құралған болатын. Екінші орынды сол «Локомотив» командасы иеленсе, Атырау жүк тасымалы командасы 3-ші орынға шықты. Жеңімпаз локомтившілер енді тораптық командалар арасындағы келесі іріктеу ойынына қатысады.