Қайта ашылған кен орындары Жалғызтөбе станциясының тамырына қан жүгіртті
Абай облысы бойынша меншікті тілші
Соңғы ширек ғасырда жаңарудың сан түрлі сатысынан өтіп, жаңғырған станциялардың бірі – байырғы Түрксіб магистралінің бойында орын тепкен Жаңғызтөбе станциясы.
Жарма-Шар телімінің 817,1 шақырымында орналасқан 3-класты Жаңғызтөбе станциясы бүгінде құрылымдық тұрғыдан жаңартылып жатыр. Бұл жайт әсіресе соңғы бес жылдың ішінде күрт қарқын алған. Жолаушы- ларға қызмет көрсету саласы ғана емес, өндіріс көлемі де жыл санап арту үстінде. Осы өңірдегі қайтадан ашылған кен орында- рынан құрамында алтыны бар сульфидті руда өндіру жолға қойылғалы бері жүк тиеу көлемі ғарыштық жылдамдықпен өсті. Сәйкесінше, ұлттық компания мен бөлімше басшылығы тарапынан жасалған оңтайлы жағдайлар жүк айналымына, жалпы өндіріске серпін берді. Мәселен, 2016 жылдан бастап бүгінгі күнге дейін вагондарға жүк тиеу көлемі бірнеше есеге өсіпті. Яғни, осыдан он жыл бұрын небары 296 вагонға жүк артылса, өткен жылы 7 200 вагон жөнелтілді. Ал, биылғы жылғы болжамды жоспар бойынша жүк тиеу 8 000 вагонға жеткізілмек.
Сонымен бірге, мемлекеттік «Нұрлы жол» бағдарламасы аясында халықаралық маңызға ие Қалбатау-Майқапшағай күре жолының күрделі жөндеуден өтуі себепті «Қазавтожол» АҚ тапсырысы бойынша қиыршық тас, құм, дизельді отын мен битум тәрізді бірқатар құрылыс заттары да үздіксіз жеткізілуде. Атап айтсақ, станция бойынша 2016 жылдан бері жүк түсіру 193 пайызға өсіпті. Дәл осы жылы 802 вагон жүк түсірілсе, өткен жылы оның көлемі 2000 вагонға артты. Ал, биылғы жылға жасалған болжам 2 300 вагон жүк түсіру болып отыр.
Бүгінде Жаңғызтөбе станциясы бойынша айына шамамен 800- 850 тонна жүк артылуда. Өндіріс көлемінің артуына байланысты ай сайын дерлік жаңадан жұмыс орындары ашылып, жолшылар, байланысшылар, сонымен қатар пойыз құрастырушылар жұмысқа алынған. Клиенттермен жұмыс ерекше жолға қойылған. Мәселен, жүк түсіру бойынша түрік және қытайлық компаниялардың аймақтық өкілдерінен өтініштер келіп түсуде. Осылайша станцияның жүк айналымы бойынша әкелетін жылдық табысы миллиард теңгеден асады. Осыған орай Жаңғызтөбеге екінші класты станция дәрежесін беріп, өндірістің ұлғаюына сәйкес бірқатар күрделі қызметтік өзгерістер енгізу көзделуде. Жалпы, жаңғырған Жаңғызтөбе станциясы ұлттық компанияның бүгінгі жетістіктерін әйгілеп тұр десек, қателеспейміз. Тек жүк айналымы бойынша ғана емес, аймақтағы жолаушы тасымалында маңызды нысанға айналған теміржол вокзалы да жаңартылыпты. Тәулігіне шамамен 80-100 жолаушы шартараптан келіп түседі. Олар үшін қолайлылық арттырылған. Инфрақұрылымды дамыту мақсатында станция басшысы Азамат Нұрғалиев бастаған жергілікті теміржолшылар жыл басынан бері қарқынды жұмыс жүргізуде. Теміржолшылардың күш салуымен кеңес дәуірінде тоқтап қалған қосымша кірме жолдар қайтадан іске қосылыпты.
Қазіргі уақытта 100-ден аса теміржолшы тұратын шағын кент осылайша ұлттық компания тарапынан жасалған бастамалар нәтижесінде өркендеу үстінде.