Шұбарқұдық станциясында бір жылда ел аумағына 800 вагон құм жөнелтілген
Ақтөбе облысы бойынша меншікті тілші
«ҚТЖ-Жүк тасымалы» ЖШС Батыс аймақтық филиалына қарасты Шұбарқұдық станциясының іргесі Атырау-Қандыағаш темір жол құрылысы кезінде қаланған. Теміржол желісі Атырау мен Орск жолдарын байланыстырады.
Бірнеше тармақ жолдың түйіскен торабында орналасқан Шұбарқұдық станциясында қашан да қызу тірлік. Отыздан аса теміржолшысы бар станцияда тек жергілікті өңір халқы еңбек етеді. Станция бастығы Алтай Абдуллиннің айтуынша, Станция тақ және жұп пойыздарды қабылдау мүмкіндігі бар, жеткізілетін жүктердің дені – құрылыс заттары. 2021 жылы Шұбарқұдық станциясынан 367 вагон жүк түсірілген болса, оның басым бөлігі – құрылыс материалдары. Тұрмыстық қажеттілік үшін 7 вагон көмір түсірілген.
Айта кетерлігі, Шұбарқұдықтың табиғаты басқа өңірлерге қарағанда біршама қатал, қысы қарлы боранды және ұзақ болады. Бүгінгі таңда станциялықтар қар тазалау жұмыстарына жиі шығып, станция жолдарымен қоса жолаушы пойыздары тоқтайтын жолдарды перронды мұздан тазартып тұрады.
Станция ғимараты күтімді, таза, бөлмелер жақсы жабдықталған, түрлі нұсқаулар, қозғалыс қауіпсіздігі, стандартты емес жағдайда қауіпсіздіктің сақталуы, т.т. стендтер ілініп, толық ақпараттандырылған. Техникалық сабақтар апта сайын өтеді. Қоғаммен тығыз байланыста жұмыс істейтін теміржолшылардың дені коронавирус індетіне қарсы екпе алған.
Айта кетейік, өткен жылы ақтөбеліктер Маңғыстау және Қызылор- да облыстарындағы қуаңшылыққа байланысты көмек қолын созу жұмыстарын осы Шұбарқұдық станциясы арқылы ұйымдастырды.