Жосалы станциясы жылды табысты қорытындылады

Қызылорда жүк тасымалы бөлімшесінің Жосалы станциясының осы жылды табысты қорытындылауына барлық алғышарт бар. Өндірістік көрсеткіштер жоғары деңгейді бағындырып, пойыздар қозғалысының қауіпсіздігі мінсіз деңгейде сақталып отыр.

Станция бастығы Бауыржан Баянов бұл ұжымның ортақ жетістігі, әр теміржолшының ортақ іске қосқан үлесі дейді. Байырғы станцияда бөтен адам жоқ, бәрі де осы жерде туып-өскен, көпшілігі теміржолшылар дәстүрін ұстанып, ата кәсібін жалғастырып келе жатқан еңбек әулеттерінің өкілдері.  Теміржол жұмысының дәлдігі мен қауіпсіздігі көбіне парк кезекшілерінің іскерлігіне байланысты. Осы бағытта көп жылдық тәжірибесімен танылған Қайырбек Жалғасбаев парктегі қозғалысты үйлестіріп, әр вагонның дұрыс бағытқа жол тартуын қамтамасыз етіп келеді. Оның салқынқанды, сабырлы болмысы мен сергектігі – мыңдаған тонна жүктің уақытылы жеткізілуіне ықпал етіп отырған маңызды фактор.  

Станциядағы жұмыс ырғағының дұрыс құрылуы мен пойыздардың кідіріссіз қабылданып-жөнелтілуі – станция кезекшісі Алтынбек Мұхтарбаевтың ерен еңбегінің нәтижесі. Алтынбектің ауысымында артық қимыл болмайды, кезекшілік барысында әрбір операцияны мұқият бақылап, қозғалыстың қауіпсіздігі мен тәртібін үздіксіз қадағалап отырады. Оның шеберлігі мен жұмысқа деген жауапкершілігі – станция жұмысының тұрақтылығының кепілі дейді станция бастығы.

Жүктерге қатысты құжат айналымы да ширақтық пен дәлдікті талап ететін күрделі процесс. Бұл міндетті мінсіз атқарып жүрген тасымалдау құжаттарын өңдеуші оператор Бақытгүл Әбілованың құжат рәсімдеудегі ұқыптылығы мен тиянақтылығы – станция жұмысының ажырамас бөлігі.  

Пойыз құрамын жасақтау – теміржол саласындағы ең жауапты жұмыстардың бірі. Станциядағы пойыз құрастырушы Қуандық Істібаев өз жұмысында талап пен тәртіпті бірінші орынға қойып, сенім үдесінен шығып жүрген маман. Әр вагонды нақты орнына қою, тежегіштерді тексеру, құрамды дұрыс бекіту – оның күнделікті жұмысы.  

Жүктерді қабылдап, жөнелту барысындағы қаржылық және құжаттық есепті жүргізу – тауар кассирі Мейрамкүл Құлшықбаеваның міндеті. Ол әр операцияны мұқият қадағалап, есеп-қисаптың дәлдігіне мән береді. Мейрамкүлдің жауапкершілігі жүк жөнелтушілер мен станция арасындағы сенімді байланысты нығайтып отыр.  

Жүк қабылдап-тапсырушы Әсем Өтегенова әр вагонды уақытында қабылдап, жөнелтілетін жүктердің толықтығын, құжаттардың дұрыстығын тексеріп, барлық процесті нақтылықпен жүргізіп келеді. Оның ұқыптылығы станциядағы логистикалық жұмыстың үздіксіздігін қамтамасыз етеді.  

Станция бастығы Бауыржан Баяновтың айтуынша, Жосалы станциясының табысы осы азаматтардың адал еңбегінде жатыр.