Қауіпсіздікті қадағалаудың қандыағаштық үлгісі

Ақтөбе аймағындағы теміржол қауіпсіздігін қамтамасыз етуде Қандыағаш вагон пайдалану депосының орны бөлек. Бір жылда 5 миллионнан аса вагонға техникалық қызмет көрсетілген депода 500-ден аса вагон қараушы еңбек етеді. Тәулігіне мыңдаған вагон қозғалысын бақылап, қауіпсіздігін қамтамасыз етіп отырған ұжым үшін кәсіби жауапкершілік – басты қағида.

Қандыағаш вагон депосы Ақтөбе мен оған шектес өңірлердегі жалпы ұзындығы 1631 шақырым, ал кепілдік иіндер 1741 шақырымды құрайтын желі бойындағы қауіпсіз қозғалысқа қызмет көрсетеді. Депо құрамында 7 техникалық қызмет көрсету пункті, 2 бақылау-техникалық қызмет көрсету пункті, 24 бақылау пункті, 8 техникалық тапсыру пункті, 5 ағымдағы жөндеу пункті бар. Вагон ақауларын ерте анықтау үшін 39 пункт 73 байланыссыз бақылау құрылғыларымен жабдықталған. Міне, бүкіл аймаққа тармақталған алып өндірістік қуатқа ие депо қысы-жазы үздіксіз, жоғары жүктемемен жұмыс істейді.  

Депо бастығы Еркін Жананбаев үлкен ұжымды 2016 жылдан бері басқарып келеді. Штаттағы 708 адамның 520-сы вагон қараушылар. Бұл – депоның негізгі тірегі, пойыздар қозғалысы қауіпсіздігін тікелей қамтамасыз ететін мамандар.  

– Өткен жылы депо бойынша 5 146 000 вагон техникалық бақылаудан өткізілді. Бұл көрсеткіш біздің жұмыс ауқымымызды көрсетеді. Бүкіл Ақтөбе аймағындағы қозғалыс қауіпсіздігін қадағалап отырған Қандыағаш депосының өз жұмыс үлгісі қалыптасқан. Басшылық құрам басқару жүйесін жетілдіруге, өндірістік үдерістерді орталықтандыруға және жауапкершілікті арттыруға күш салса, вагон қараушылардың қалыптасқан өз жұмыс тәсілдері, өз мектебі бар. Нәтижесінде қандыағаштық вагон қараушылар жылжымалы құрамнан анықтаған ақау саны жыл сайын артпаса, кеміген емес, сонымен қатар олардың арасында ерен еңбегінің арқасында «Үздік вагон қараушы», «Қозғалыс қауіпсіздігі үшін», т.б. марапат иелері аз емес, – дейді депо бастығы.  

Өткен жылы «Үздік вагон қараушы» марапатын алған вагон қараушы Алматжан Аманжолов – солардың бірі. «Бұл марапат – оның көп жылғы тәжірибесі мен кәсібилігінің нәтижесі» деген депо бастығы тағы екі тәжірибелі маман Үсен Байжігітов пен Әбдімұрат Жақыпов Президенттің Құрмет грамотасымен марапатталғанын мақтанышпен жеткізді. Алматжан Аманжолов – Қандыағаш қаласының тумасы. 35 жылдан бері табан аудармай осы депода еңбек етіп келеді. Бүгінде Ақтөбе, Никельтау, Шұбар, Орал бағыттарынан келетін құрамдарға қызмет көрсетеді. Келу паркінде вагондарды дөңестен түсіріп, техникалық ақауларын тексереді. Жүк тиелетін вагондарды толық дайындап, жөнелту паркіне жібереді.  

– Ең бастысы әр дыбысқа, әр белгіге мән беру керек, қалғаны тәжірибемен келеді. Біз жұмы сымызды бастаған кезде бәрі әлдеқайда қиын еді, ақауды анықтау да күрделі болатын. Бүгінде технология дамып, түрлі құрылғылар көмекке келіп, жұмыс та жеңілдеді, – деді тәжірибелі вагон қараушы.  

Ол бүгінде депоға келген жас мамандардың тәлімгер ұстазы ретінде кәсіпке үйретіп, бағыт-бағдар береді. Ақауды алдымен байқаса, жанындағы жас шәкіртінің қырағылығы мен тәжірибесін арттыру үшін өзіне тапқызуға тырысады екен.  

– Жұмысшылардың еңбек жағдайын жасау – біз үшін бірінші кезектегі міндет. 2025 жылы депо инфрақұрылымын жаңғырту аясында Жем мен Шұбарқұдық станцияларындағы ғимараттарға ағымдағы жөндеу жүргізілді. Жылу жүйелері, душ бөлмелері мен ас ішуге арналған орындар жаңартылып, еңбек жағдайын жақсартуға бағытталған жұмыстар атқарылды. Сонымен қатар Қандыағаштың өзінен депо қызметкерлерін таңертең жұмысқа, кешке үйлеріне тасымалдайтын 25 орындық ПАЗ автобусы ұйымдастырылған, – деді депо бастығы.  

2026 жылдан бастап Қандыағаш вагон депосы тікелей Астанаға қарайды, «ҚТЖ» ҰК» АҚ «Тасымалдау үдерісі дирекциясы» филиалы құрамында жұмыс істейді.