Жүк тасымалы мен магистральдық желіні біріктіру – уақыт талабы

«Қазақстан темір жолы» ұлттық компаниясы қазір ұйымдастырушылық өзгерістер мен трансформацияның маңызды кезеңін бастан кешіруде. Осы трансформация шеңберінде Жүк тасымалы бөлімшесі мен Магистральдық теміржол желісін біріктіру мәселесі қарастырылуда. Бұл маңызды мәселе хақында компанияның Консультативтік кеңес мүшесі Қырықбай Әлсейітовті сөзге тартып, ой-пікірін білдік.

Қырықбай Әлсейітов еңбек жолын 1959 жылы Аягөз станциясы паровоз депосында автомат цехының бригадирі болып бастап, 2007 жылы «ҚТЖ» ҰК» АҚ – «Семей тасымалдау бөлімшесі» филиалында жетекші инженер болып аяқтаған. Елу жылға жуық жұмыс істеп, осы жерден еңбек демалысына шыққан.  

«Жұмыс орнынан қол үзсем де, саладағы орын алып жатқан жаңалықтар мен жаңашылдықтардан үнемі хабардармын. Қазіргі кезде теміржол саласында көптеген өзгерістер орын алуда. Еліміздің жаһандық бәсекелестік жағдайында қабылдап жатқан оңтайлы шешімдерін дұрыс қадам деп білемін. Жүк тасымалы ұлттық экономикаларға кіріс келтіретін басты табыс көзіне айналып отыр. Сондықтан еліміз қолға алып жатқан көптеген бастамалар уақыт талабынан туындауда. Бұл орайда Жүк тасымалы – Жол бөлімшесі (ЖТ-ЖБ) мен Магистральдық теміржол желісін (НЖС) біріктіру де соның жарқын мысалы дер едім. Ұтымды шешім сала жұмысын өрге сүйремесе, кері тартпайды. Оған талай рет көзім жетті. Кеңестік дәуірден қалған кейбір орынсыз іс-әрекеттерден біртіндеп арылып келеміз. Оның орнына жаңаша көзқарас қалыптасып, басқаша басқару әдістері кеңінен енгізіліп отыр. Бұл көңілге қуаныш ұялатады. Жылдан жылға жұмыс процесі барынша жеңілдей түсуде. Бүгінде барлығы автоматтандырылуда. Біздің кезімізде болмаған технологиялар енгізіліп жатыр. Осындай игі шараларды қолға алып отырған «ҚТЖ» ҰК» АҚ бастамасын қолдаймын», – дейді Құрметті теміржолшы Қ. Әлсейітов.  

Сала ардагері атап өткендей, біріктіру жұмыстарын жүргізу барынша оңтайлы шығар. Бірақ бұл жұмысшылардың еңбек жағдайына қалай әсер етеді деген ой да жоқ емес. Алайда, бұл бастама еліміздің заң талабынан туындағандығын да реті келгенде айта кету керек.  

«Мені де қызықтырған басты мәселе жұмысшылардың еңбек жағдайы қалай болады деген жайт еді. Оған да жауап берілді. Менің білгенім, жұмысшылардың еңбек жағдайлары, жалақы мен жұмыс режимі өзгеріссіз қалатын болыпты. Және де әлеуметтік пакет пен өзге де жеңілдіктер сақталады. Сонымен қатар қызметкерлер өз орындарын сақтап қалуы үшін қайтадан құжаттар жинап, бас ауыртпайды. Ал егерде медициналық тексеру мерзімі аяқталғандай жағдай орын алса, онда қызметкер жұмыс беруші қаражаты есебінен өтеді. Онда да мұндай медициналық тексерістен 1 жыл ішіндегі жұмыс мерзімінің аяқталуы шарт, егер мерзімі өтпесе, онда қажеті жоқ. Бұл ретте ерікті медициналық сақтандыру кепілдік беретін құқықтар сақталып, лимиттер жойылмайды. Сонымен қатар сыйлықақы төлемдерінің барлық түрі басқа құрылымға ауысқанда да сақталады. Есептеу және төлеу тәртібі бұрынғыдай қалады екен. Мұнысы енді дұрыс шешім. Жұмысшылардың ауысуы бойынша демалыс күндері де жалғасын тауып, бұрынғы жұмыс орнында пайдаланылмаған демалыс күндеріне өтемақы төленеді екен. Егер кесте бойынша демалыс жоспарланған болса, Магистральдық теміржол желісіне жұмысқа ауысқан жағдайда сол жоспарланған мерзімде еңбек демалысына кете алады», – дейді Консультативтік кеңес мүшесі.