Мемлекет басшысы Еуразияның көлік-логистикалық әлеуетін арттыруды ұсынды
Президент Қасым-Жомарт Тоқаев Бішкекте өткен Шанхай ынтымақтастық ұйымына мүше мемлекеттер басшылары кеңесінің отырысына қатысып, Еуразия кеңістігіндегі көлік-логистикалық байланыстарды одан әрі дамыту қажеттігіне тоқталды, деп хабарлайды Rail-news.kz.
Мемлекет басшысының айтуынша, ШЫҰ елдерінің географиялық орналасуы ұйым үшін маңызды стратегиялық артықшылыққа ие. Осы мүмкіндікті тиімді пайдалану арқылы Еуразияның заманауи көлік-логистикалық қаңқасын қалыптастыруды жеделдетуге болады.
Президент Қазақстанның халықаралық көлік дәліздерін өзара байланыстыруға ерекше мән беретінін атап өтті. Атап айтқанда, «Бір белдеу, бір жол» мегажобасын Транскаспий халықаралық көлік бағдары және Солтүстік – Оңтүстік дәлізімен, сондай-ақ Орталық және Оңтүстік Азиядағы перспективті сауда бағыттарымен ұштастыру маңызды.
Қасым-Жомарт Тоқаев Қазақстанның ШЫҰ кеңістігінде көлік саласындағы бастамаларды ілгерілетуге дайын екенін жеткізді. Ол үшін ең алдымен кеден рәсімдерін цифрландыру, электрондық құжаттарды өзара тану және «жасыл дәліз» қағидатын кеңінен енгізу қажет.
Президент осы бағыттағы маңызды бастамалардың бірі ретінде ШЫҰ Бірыңғай транзит цифрлық платформасын құруды ұсынды. Мұндай жүйе жүктің жөнелту пунктінен соңғы алушыға дейінгі қозғалысын жеңілдетіп, транзиттік операцияларды үйлестіруге мүмкіндік береді.
«Бұл үйлесімді цифрлық шешімдер негізінде жүктің жөнелту пунктінен соңғы нүктедегі алушыға дейін кедергісіз өтуіне мүмкіндік береді», – деді Мемлекет басшысы.
Сонымен қатар Президент ұйымның көлік байланыстары бойынша ұзақ мерзімді саясатын айқындайтын құжат қабылдау қажеттігін айтты. Осыған байланысты Қазақстан Шанхай ынтымақтастық ұйымының 2035 жылға дейінгі Көлік байланысы стратегиясын әзірлеп, қабылдауды ұсынды.
Бұл бастамалар Еуразиядағы транзиттік бағыттарды тиімді байланыстырып, Қазақстанның халықаралық көлік-логистикалық хаб ретіндегі рөлін одан әрі күшейтуге мүмкіндік береді.
Сонымен қатар жиында Қырғызстан Президенті Садыр Жапаров, Беларусь Президенті Александр Лукашенко, Үндістан Премьер-министрі Нарендра Моди, Иран Президенті Масуд Пезешкиан, ҚХР Төрағасы Си Цзиньпин, Пәкістан Премьер-министрі Шахбаз Шариф, Ресей Президенті Владимир Путин, Тәжікстан Президенті Эмомали Рахмон және Өзбекстан Президенті Шавкат Мирзиёев сөз сөйледі.