Латвияға алғашқы электр пойыздары жеткізілді
Ел ішінде жолаушылар тасымалымен айналысатын латвиялық Pasažieru vilciens компаниясы Škoda Vagonka шығарған жаңа электр пойызын таныстырды, деп хабарлайды Rail-news.kz.
Латвия бұл электр пойыздарын Еуропалық Одақтың жолаушылар тасымалы қауіпсіздігі талаптарына сәйкестігін сертификаттау үшін сынақтан өткізіп жатыр.
Pasažieru vilciens компаниясы 2023 жылдың соңына дейін жолаушы тасымалы үшін 32 электр пойызын түгелдей жеткізбек. Әр пойыз төрт вагоннан тұрады және бір пойыздың ұзындығы 109 метр. Мұндай пойызда – 436 отыратын және 454 тұрып тұратын орын бар.
Жалпы жобаның құны 257, 889 млн еуро, оның ішінде 23 пойызды Еуропалық Одақтың бірігу қорының 114, 211 млн еуро шамасындағы қаржыландыруымен сатып алу жоспарланып отыр.
Škoda Vagonka компаниясының басқарма төрағасы Мартин Беднаржтің айтуынша, алғашқы электр пойызы барлық сынақтан өткен соң, келесі жылдың қаңтарында жолға шығады.
Қазіргі таңда Латвияға алғашқы сынақтан өткен екі құрам жеткізілген.
Пойыздарда жолаушыларды бір деңгейлі отырғызу платформасы болады және ені 1,3 м қос есік қарастырылған, бұл жолаушылардың пойызға кіру, шығу уақытын қысқартуға мүмкіндік бермек.