Анкара-Измир темір жол желісінің құрылысы қайта жанданды
Түркияның Афьонкарахисар қаласында жоғары жылдамдықты темір жол магистралі құрылысының қайта іске қосылу салтанаты өтті, деп хабарлайды Rail-news.kz.
Анкара – Афьонкарахисар – Ұшақ – Измир бағытындағы жоғары жылдамдықты темір жол желісі 508 шақырым. Оның құрылысы 2025 жылы аяқталады деп жоспарланып отыр.
Сағатына 250 км жылдамдықпен жүретін пойыздарға арналған темір жол желісінің арқасында Афьонкарахисар қаласынан Анкараға дейін жету уақыты 1 сағат 30 минутқа қысқармақ.
2022 жылдың наурыз айында Ұлыбританияның Экспорттық несиелерді кепілдендіру департаменті жоғары жылдамдықты желі құрылысын қаржыландыруға 2,1 миллиард еуро бөлетінін растаған.
Темір жол желісінің құрылысы қазір төрт участокте жүріп жатыр: Полатлы – Афьонкарахисар, Афьонкарахисар – Баназ (Ұшақ), Баназ – Салихлы (Маниса) және Салихлы – Менемен (Измир) аралығында.
Полатлы – Афьонкарахисар участогындегі құрылыс жұмыстары 2013 жылы басталған, алайда 2018 жылы тоқтап қалған.