Жоғарғы орындағы жолаушыларға төменгі орында тамақтануға ресми рұқсат берілді
Ресейде вагонның үстіңгі орнына билет сатып алған пойыз жолаушылары 2023 жылдың 1 қыркүйегінен бастап төменгі орынға жайғасып тамақтану құқығына ие болады. Бұл туралы Ресейдің Қоғамдық палатасы мәлімдеді, деп хабарлайды Rail-news.kz.
Көлік министрлігінің бұйрығына сәйкес, вагонның жоғарғы орнындағы жолаушыларға сағат 7.00 мен 10.00 аралығында төменгі орынға отырып тамақтануға жарты сағат уақыт беріледі, ал түскі 12.00 мен 15.00 аралығында бір сағат, кешкі аста 19.00 мен 21.00 аралығында 30 минут астынғы орында отырып тамақтануға толықтай құқығы бар.
Пойызбен көп саяхаттайтындар мұндай жаңалықты жақсы қабылдаған. Өйткені астыңғы орында отырған жолаушы үстіңгі орындағы бейтаныс адамдардың өз орнына отырып тамақтанғанын жақтыра бермейді екен, көп жағдайда бір-бірін танымайтын адамдар арасында дау шығатын көрінеді. Ал, кейбір жуас адамдар астындағы жолаушыны тіптен мазалағысы келмейді.
«Осындай үнемі бітпейтін проблеманың заң түрінде шешілгені қуантады. Енді ұшақта ортаңғы креслода отыратындардың жайы шешілсе екен. Өйткені сапарлас адамдар көп жағдайда шынтағын тіреп отыратын қол тіректерін бөлісе алмай қалып жатады», – дейді турист Карина Иванова.
Еліміздің пойыздарында орынды бөлісе алмай қалып жатқан жолаушылар байқалмайды. Сапарлас жолаушыға сыйластықпен қарап, оның тамақтануына жол беру – адамгершіліктің нышаны деп білеміз.