Түркия алғашқы отандық электр пойызын іске қосты
Түркия темір жолдарының жолаушылар мен жүк тасымалының ұлттық операторы TCDD Taşımacılık алғашқы отандық электр пойызын іске қосты. Жаңа пойыз елдің солтүстік-батысындағы Адапазар қаласы мен Стамбұлдың шығысындағы Гебзе қалалары арасында қатынайды, деп хабарлайды Rail-news.kz.
Электр пойызы 160 км/сағ жылдамдықпен жүруге есептелген. Аталған бағыттың ұзақтығы 100 шақырым және жол бойында 11 аялдама бар.
Отандық пойызды Түркияның TÜBİTAK Ұлттық ғылыми және технологиялық зерттеулер кеңесінің қатысуымен TÜRASAŞ компаниясы жобалап, жасап шыққан. Жылжымалы құрам еуропалық TSI өзара әрекеттесу стандарттарына сәйкес келеді.
Пойыз бес алюминді вагоннан тұрады, оның ішінде біреуі бірінші класты және асханасы бар. Отырып баратын 324 орынмен қатар мүмкіндігі шектеулі жолаушыларға арналған екі купе қарастырылған.