Қырғызстанда Қытай – Қырғызстан – Өзбекстан бағыты бойынша алғашқы тоннельдің құрылысы басталды

Қырғызстан аумағында Қытай – Қырғызстан – Өзбекстан халықаралық көлік жобасы аясында алғашқы теміржол тоннелінің құрылысы басталды. Бұл туралы Қырғызстан республикасының Министрлер кабинетінің баспасөз қызметі мәлімдеді, деп хабарлайды Rail-news.kz.

Тоннель қазу жұмыстарының басталу салтанатына Қырғызстан Министрлер кабинетінің төраға орынбасары, сонымен қатар су ресурстары, ауыл шаруашылығы және қайта өңдеу өнеркәсібі министрі қызметін атқаратын Бақыт Төрөбаев қатысты. Ол өз сөзінде жобаның маңыздылығын атап өтіп:

«Қытай – Қырғызстан – Өзбекстан теміржолы — Шығыс пен Батысты жалғайтын стратегиялық маңызды көпір» деді.

«Бұл жоба тек инфрақұрылымдық қана емес. Ол өмір сүру сапасын арттыруға, экономикалық өсімге және аймақтар мен халықтар арасындағы байланысты нығайтуға жол ашады. Сауда, инвестиция, өнеркәсіп пен логистика дамып, мыңдаған жаңа жұмыс орындары құрылады. Бұл елдеріміздің экономикасына қуатты серпін береді», – деді Төрөбаев.

Бастапқыда салынып жатқан тоннельдің ұзындығы шамамен 12 шақырым болады. Ол Жалал-Абад облысының Сузақ ауданын Нарын облысының Тоғыз-Торо ауданымен байланыстырады. Болашақта Қырғызстан аумағында тағы екі осындай тоннель салу жоспарланған.

Баспасөз қызметінің мәліметінше, Қытай – Қырғызстан – Өзбекстан теміржолының Қырғызстан аумағынан өтетін бөлігі 300 шақырымнан асады, ал бүкіл құрылысқа салынатын инвестиция көлемі 4,7 миллиард долларды құрайды. Жоба аясында жалпы ұзындығы 120 км болатын 46 көпір мен 27 тоннель салу көзделіп отыр. Осылайша, барлық 450 км бағыттың шамамен 40%-ы тоннельдер мен көпірлер арқылы өтеді. Теміржол құрылысын ресми бастау 2024 жылғы желтоқсанда жарияланған.