2026 жылы Қытай - Еуропа бағытындағы жүк тасымалы 25%-ға артты
2026 жылдың қаңтар-ақпан айларында Қытай мен Еуроодақ елдері арасында теміржол көлігімен 352 мың TEU (жиырма футтық эквивалент) жүк тасымалданды. Бұл 2025 жылдың сәйкес кезеңімен салыстырғанда 25%-ға артық. Осы уақыт ішінде жүк пойыздарының саны 32%-ға артып, 3501 рейске жетті, деп хабарлайды Rail-news.kz.
Қытай теміржолының (CR) аймақтық бөлімшесі — Urumqi Bureau Group мәліметінше, елдің солтүстік-батысындағы Шыңжаң-Ұйғыр автономиялық ауданында орналасқан Алашаңқай құрлық порты арқылы 2026 жылғы 5 наурыздағы жағдай бойынша Қытай — Еуропа және Қытай — Орталық Азия бағытындағы жүк пойыздарының саны өткен жылмен салыстырғанда 24,1%-ға өсіп, 1498-ге жеткен.
Қытайлық Global Times басылымының хабарлауынша, 2025 жылдың маусым айындағы жағдай бойынша Қытай — Еуропа ресми бағыттар желісіне пойыздар аттанатын және келетін пункт ретінде Қытайдың 128 қаласы енген.
Seetao медиаплатформасының деректеріне сәйкес, тасымалданатын тауарлардың түрі де көбейіп келеді. Егер бастапқы кезеңде киім-кешек пен күнделікті тұтыну тауарлары басым болса, қазіргі уақытта автобөлшектер, электронды жабдықтар сияқты қосылған құны жоғары тауарлар тасымалының көлемі артып жатыр.