Ресей мен Үндістан бірігіп электр пойыз жасап жатыр
Ресейлік ТМХ мен Үндістанның бірлескен кәсіпорны «Vande Bharat» жатын электропойызының алғашқы шанағын шығарды, деп хабарлайды Rail-news.kz.
Ресейлік «Трансмашхолдинг» (ТМХ) пен үндістандық RVNL компанияларының бірлескен кәсіпорны Kinet Railway Solutions басты вагон шанағын дайындау жұмыстары аяқталғанын хабарлады. Қазіргі уақытта жылжымалы құрам өндірісі Латурдағы Marathwada Rail Coach зауытында жүргізілуде. 16 вагонан тұратын пойыздың прототипі маусым айында таныстырылады деп күтілуде. Ол сағатына 160 шақырым жылдамдықпен жүруге есептелген.
Indian Railways (IR) ұлттық тасымалдаушысы мен Kinet Railway Solutions арасында 2023 жылы жасалған келісімшарт бойынша 120 пойыз (1920 вагон) жеткізіліп, оларға 35 жыл бойы техникалық қызмет көрсетілуі тиіс. Бұған дейін ТМХ өкілдері мәміленің жалпы құны шамамен 6,5 млрд долларды құрайтынын атап өткен болатын. Өткен жылы бірінші класты төрт орындық жатын купенің толық өлшемді макеті мен экстерьердің жаңартылған тұжырымдамасы ұсынылған еді.
Айта кетерлігі, жатын вагондары бар алғашқы «Vande Bharat» электропойыздары Үндістанда қаңтар айынан бері қатынап жүр. Олар BEML зауытында (Бангалор) IR-мен жасалған 10 құрамға арналған келісімшарт аясында шығарылған. Сонымен қатар, осындай 80 электропойызды (1280 вагон) жеткізуге арналған тапсырысты Titagarh Wagons пен BHEL консорциумы жүзеге асыруда.