Talgo рекордтық тапсырысқа қол жеткізді
2025 жылдың қорытындысы бойынша Talgo компаниясының түсімі 618 млн еуроны, ал қарыз көлемі 394 млн еуроны құрады. 2025 жылдың соңына қарай компанияның тапсырыс портфелі 4,47 млрд еуроға бағаланса, 2026 жылдың ақпанында бұл көрсеткіш рекордтық 5,77 млрд еуроға жетті, деп хабарлайды Rail-news.kz.
Бұл серпіліске Сауд Арабиясының мемлекеттік теміржол компаниясымен (SAR) жасалған 1,3 млрд еуролық келісімшарт септігін тигізді. Келісім аясында 20 жоғары жылдамдықты электр пойызын жеткізу және 2033 жылға дейін жаңа әрі бұрыннан бар пойыздарға техникалық қызмет көрсету қарастырылған.
Жылжымалы құрам өндірісі мен сервистік қызмет көрсетудің болашағын қамтамасыз ететін Talgo-ның негізгі нарықтары Еуропа мен Таяу Шығыс.
2025 жылдың мамырында немістің жеке операторы FlixTrain-ге 65-ке жуық «push-pull» үлгісіндегі жүрдек пойыздарды жеткізу бойынша 2,4 млрд еуролық (оның 1,1 млрд еуросы нақтыланған) негіздемелік шартқа қол қойылды.
Алдағы 2 жылда компания тапсырыс көлемін 7,9 млрд еуроға дейін ұлғайтуды көздеп отыр.
Компания бизнестің оң динамикасын сақтап, түсімді 750 млн еуроға жеткізуді және 200-ге жуық жаңа маманды жұмысқа қабылдауды жоспарлауда.
2030 жылға қарай компания қазіргі Avril пойыздарының орнын басатын, сағатына 350 шақырым жылдамдықпен жүретін жаңа инновациялық платформа әзірлемек. Бұл пойыздар энергияны үнемдеуімен қатар, жайлылық пен қауіпсіздіктің ең жоғары талаптарына сай болады.
Сондай-ақ, 2025 жылдың желтоқсанында Баск елі автономды бірлестігінің үкіметтік және қаржылық құрылымдарынан құралған консорциум маңызды мәмілені аяқтады. Олар негізгі акционер Pegaso Transportation International компаниясынан Talgo акцияларының 29,7 пайызын сатып алды.