«Мойынты – Достық» телімінің екінші жолдары балқаштықтар бақылауында
«Қазақстан теміржолшысы» газетінің тілшісі
Балқаш жол дистанциясы – «Мойынты – Достық» телімінің екінші жолдары бойынша құрылыс жұмыстарын қабылдап алатын бірден бір мекеме. Себебі, ұзындығы 800 км-ден астам жаңа жолдың 400 шақырымы осы дистанцияға тиесілі.
Аталған дистанцияны бүгінде тәжірибелі теміржолшы Ернұр Тұрбаев басқарады. 2003 жылы Тоқырбас станциясында еңбек жолын жолшы болып бастаған ол бүгінде 20 жылдық тәжірибесі бар білікті басшы.
– Біздің дистанцияға Мойынты – Саяқ телімдері арасындағы 400 км жол қарайды. Осы жолдың бойындағы №4 бекетте жаңа жол құрылысын бастау бойынша салтанатты жиын өтті. Мердігер мекеме «Integra Construction KZ теміржолды салуды бастап кетті. Біз олар салған жол бойындағы әр шақырымның жұмысын тексеріп, қабылдап алып отырамыз. Балқаш жол дистанциясында, өзімнің қарамағымда 300 адам бар. 16 айналымда 3 телім бастығы, 16 жол шебері жұмыс істейді. Яғни, осы аралықтағы 16 бекеттің жолын баптау, жағдайын жасау – біздің міндет, – дейді Ернұр Тұрбаев.
Қытай мен Еуропа арасын байланыстыратын жолдың бастауында тұрған бұл теміржол телімінен күніне 6 жолаушы пойызы өтеді. Сонымен қатар 30 жұп жүк пойыздары жүреді. Енді екінші жолдар салынып, Мойынтыға дейін жеткізілсе, транзиттік тасымал артып, осы бағытта жүк жіберетін клиенттердің сұранысы толық қанағаттандырылмақ.
Ернұр Тұрбаевтың айтуынша, дистанцияның биылғы жұмыс көрсеткіштері жоғары болған. Көктемгі және күзгі байқау комиссияларынан ойдағыдай өтіп, келесі маусымға дайындықтарын үнемі пысықтап отырады. Айына екі рет жол өлшейтін және ақауды анықтайтын вагондар осы телімнен жүріп өтеді. Дистанция ғимараты Балқаш-2 станциясында орналасқан. Жаңа жолға жауапты ұжымды басқарып келе жатқан білікті басшы «Адал еңбегі үшін» төсбелгісінің иегері және көптеген құрмет грамоталары, алғыс хаттармен марапатталған.
