Ақтөбелік жолшылар 300 шақырым жол күтіміне жауапты
Ақтөбе облысы бойынша меншікті тілші
Темір жолдың инфрақұрылым нысандарын күтіп ұстауда орасан жұмыстар атқарып отырған жол дистанцияларының орны бөлек. Ақтөбе жол дистанциясы аймақтағы үш жүз шақырымға жуық жол күтіміне жауапты.
Дистанциясының бастығы Кеңес Нұртаев биылғы атқарылған жұмыстарды баяндады. Учаскелерде пойыз жылдамдығын арттыру үшін ағымдағы күтімге баса назар аударылған. Оның үстіне биылғы жылы дистанцияда күрделі жол жөндеу жұмыстары жоспарланбаған. Арнайы техника көмегімен 108 шақырым жолды талапқа сай келтіру жұмыстары атқарылған. ПРСМ машинасымен рельс жабындысын дәнекерлеу жұмыстары орындалды. 279 түйіспе дәнекерленді. «Унимат» машинасымен 81 бағыттамалы бұрма ретке келтірілді. ширек ғасырдан аса қызмет еткен бұрмалар жаңартылғаны үлкен жұмыс болды. Биыл жоспар бойынша 14 ағаш білеулі бағыттама бұрмаларды темір бетонмен алмастыру жұмыстары атқарылды. Күзгі тексерістен табылған кемшіліктерді жою жұмыстары дер кезінде атқарылды.
«Бүгінгі таңда дистанция аумағында 13 км жерде ағаш шпал, қалғаны темір бетонға ауыстырылған. Алдағы уақытта осы 13 шақырымды темірбетонға ауыстыру жоспарланған. Сонымен қатар, ауыстыруға мерзімі жеткен темір бетон шпалдар да бар. Бұлар – келер жылдың еншісіндегі жұмыстар ”,- деді Кеңес Нұртаев.
Қауіпсіздікке ерекше мән беретін және онымен үздіксіз айналысатын жолшылар үшін төрт түліктің жолға шығып кетіп пойыз астына түсуі үлкен мәселеге айналғалы қашан. Ақтөбе үшін Жіңішке участогі – аса қауіпті аймақ. Жолдың екі жағында да елді мекен бар. Бұл жердегі қауіпсіздік тәулігіне 24 сағат бақылауда. Жыл сайын қоршау салу, барын бүтіндеу жұмыстары да дистанциялықтардың өз күшімен атқарылады. Биылғы есеп бойынша 100 шақырымнан аса жолда қоршау бар.
Ақтөбелік жолшылар бүгінгі таңда қыс қамын жасауда, қар тазалағыш, қар жинағыш техникалар сақадай сай тұр.