Жаңадан салынатын логистикалық хаб автожол, теміржол және әуе жолын біріктіреді

Алматыда өңірдің көлік-логистикалық әлеуетін дамыту бойынша бизнес-конференция өтті. Қазақстандық инвестициялық ынтымақтастық агенттігі ұйымдастырған жиынға «ҚТЖ» ҰК» АҚ, QazTrade өкілдері, Алматы облысының әкімдігі, SPG, Қытайдың Қазақстандағы консулы және бизнес қауымдастығы қатысты.

Конференция барысында Алматы облысында шетел қоймалары бар логистикалық парк пен құрғақ порты іске қосылуы мүмкіндігі айтылды. Бұл тек логистикалық сектордың ғана емес, өңір бизнесінің де дамуына септігін тигізеді. Аталған жобаны жүк тасымалы бойынша әлемдегі №1 порт – Шаньдун порт корпорациясы (SPG) ұсынып отыр, оның делегациясы Қазақстан инвестициялық ынтымақтастық агенттігінің шақыртуымен Алматыға келген.  

– Батыста бүкіл әлемді порттар байланыстырады деген сөз бар. Біз теңіз порттарынан бөлек, құрлық порттары да өте маңызды рөл атқаратынын айтқымыз келеді. Екі ел арасында барынша қолайлы логистикалық дәліз жасасақ дейміз. Біздің топ логистика және сауда саласында қазақстандық кәсіпорындармен ынтымақтастықты тереңдетуге күш салуда. Қазақстан мен Қытай арасындағы тиімді қарым-қатынасқа өз үлесімізді қосатынымызға сенімдіміз, – дейді SPG бас директоры Ли Фэнли.  

Алматы агломерациясында ірі сауда-логистикалық хаб ашу жоспарымен «ҚТЖ» ҰК» АҚ Басқарма төрағасының орынбасары Ерлан Қойшыбаев бөлісті. Оның айтуынша, оны Алматы айналма теміржол желісі (73 км) жанынан салу көзделуде.  

– Әзірге техникалық-экономикалық негіздеме жасалуда. Осы сәтті пайдаланып, SPG өкілдерін ынтымақтастықта жұмыс істеуге шақырамыз. Бірқатар ірі компаниялар хаб құрылысын салуға қызығушылық танытып отыр. Аталған жоба аясында өңір логистикасы, интермодальды тасымал дамиды, ол автожол, теміржол және әуе жолын біріктіреді. Сонымен қатар ірі құрғақ порт салынады, – деді Е.Қойшыбаев.  

Конференцияға қатысушылар Еуропа мен Ресей Федерациясынан Оңтүстік-Шығыс Азияға электромобильдер транзитін іске қосып, сондай-ақ SPG порттары арқылы қазақстандық астықты экспорттау мәселесін де қарастырды.  

– SPG серіктесіміз ретінде ұзақ мерзімді ынтымақтастық үшін күш салатынына сенімдіміз және біз өз тарапымыздан бар жағдайды жасаймыз. Әлемдегі №1 порт тобынан smart инвестициялар күтеміз. Логистикалық тасымалдаудың тиімділігін арттыру үшін қытайлық және қазақстандық тараптардың инфрақұрылымы мен мүмкіндіктерін пайдаланудың маңызын атап өткен жөн, – деді Қазақстан инвестициялық ынтымақтастық агенттігінің жетекшісі Айдын Байеділов.