Маңғыстауда жол сапасы жақсарды
Маңғыстау облысы бойынша меншікті тілші
Маңғыстау магистральдық желі бөлімшесінде жолдардың сапасын жақсарту жұмыстары жалғасуда. Ақпан-наурыз айларында Бейнеу-Тассай учаскесінің Жарқұм-Сорша-Тұрыш-Ноғайды аралығында жүргізілген жұмыс нәтижесі аймақ жолдарын айтарлықтай сауықтырған.
Таратып айтсақ, 54 шақырым жолда 25 метрлік рельстер орнына жаңадан 800 метрлік түйіспесіз рельстер салынды. Биыл Бейнеу, Үстірт, №7 бекет, Сай-Өтес, Шетпе, Манғыстау, Қарақия, Жетібай станцияларының бас жолдарында жатқан барлығы 24 дана ескі ағаш шпалды бағыттама бұрмасын жаңа темірбетон шпалды бағыттама бұрмасына ауыстыру жоспарланған. Қазірге дейін оның 14 данасы келіп, алтауы қажетті жолға салынған. Тағы 8 дана бағыттама бұрма сәуір-мамыр айларында орнатылмақ. Қалған 10 дана бағыттама бұрмасы жыл соңына қарай келеді деп күтілуде.
Түбекте жол күтімін жасап, пойыздар қозғалысын қамтамасыз ету оңай емес. Маңғыстаудың құрғақ климаты салдарынан жиі шаңды дауыл тұрып, құм борап, жолдың бетін топырақ басып қалады. Қозғалысқа қауіп төндіріп, жолшыларға артық жұмыс туындатады.
– Бөлімшеге қарасты теміржолдың өткізу қабілетін арттырып, жағдайын жақсарту бағытында жыл сайын қажетті жаңарту, жөндеу жұмыстары жүргізіледі. Соның нәтижесінде көрсеткіштеріміз де жаман емес. МДК жол өлшегіш вагонның тексеріс қорытындысына сәйкес жол күтімі 43 баллдық бірлікке орындалды. Жоспар 58 балл болатын, яғни орындалуы 126 пайызды құрап отыр,– дейді Маңғыстау магистральдық желі бөлімшесінде, жол бөлімінің бастығы Марлен Көктеубаев.