«Өндірістегі» өткел мәселесі қашан шешіледі?

Елордада «Өндіріс» тұрғын алабындағы (ел арасында «Лесозавод» атауымен таныс) теміржол өткелі – астаналықтар үшін талай жылдан бері жыр болып келе жатқан мәселе. 

Аталған аудан тұрғындары Малахов көшесіндегі осы өткел арқылы қала орталығына күн сайын қатынайды. Алайда өткелдегі жолдың дұрыс жөнделмеуі автокөлік ағынына кедергі келтіріп, тұрғындар шағымы күшейген.

Ойдым-ойдым, шұрық-тесік өткелдегі жолға жеңіл-желпі жөндеу жүргізілгенімен, бұл жерге түсетін жүктеменің көптігінен жол тез бұзылып, жарты жылда бәз-баяғы күйіне қайта түседі. Көліктен бөлек жолаушыларға арналған екі көпір де алыс болғандықтан жаяу жүргіншілер осы маңда пойыз тоқтаса, вагондар астынан өтіп, өміріне қауіп төндіреді. Сондықтан теміржолшылар да, қала тұрғындары да бұл мәселені тек сол маңнан автокөліктерге арналған көпір салу арқылы ғана шешуге болады деп санайды. Осы өтінішпен олар жергілікті билік өкілдеріне бірнеше рет шыққан. Алайда, жергілікті билік тарапынан бұл мәселе бойынша нақты шешім жоқ.  

– Былтыр шілде айында осы өткел мен көшедегі жүргіншілер жолына тесіктерін бітеп, ағымдағы жөндеу жұмыстары жүргізілді. Бірақ қозғалыстың тығыздығынан жол сапасы тез нашарлап кетті. Осыған орай өткелдерді жөндеу/абаттандыру бойынша жұмыс жүргізуге ақау актісі толтырылып, техникалық сипаттамасы әзірленіп бекітілді. Былтыр 22 қарашада Ақмола магистральдық желі бөлімшесі мен «ITS» ЖК арасында «Аумақты асфальттау» бойынша жұмыстар жүргізуге келісімшарт жасалды. Қазіргі таңда осы келісімшарт бойынша жұмыстар ауа райының қолайсыздығына байланысты сәуір айына шегерілді, себебі қазір қыстың күні, қар қатып жатқан кезде жасалған жұмыс бәрібір сапасыз болып, кеткен материал мен қызмет босқа шығын болады, – дейді Астана жол дистанциясы бас инженері Төленді Шапшекеев.  

Оның айтуынша, «ҚТЖ» ҰК» АҚ вице-президентінің 2013 жылғы 13 желтоқсандағы № 1627-ЦЗ бұйрығына сәйкес өткелдің шекті аумағына рельстен бастағанда 10 метрге дейінгі қашықтық қана жатады, ал қалған жер мемлекеттік мекемелерге тиесілі.