Ақтөбеде 78 шақырым жол жаңарады
Ақтөбе облысы бойынша меншікті тілші
«ҚТЖ» ҰК» АҚ – Ақтөбе магистральдық желі бөлімшесі сәуір айының ортасынан бастап аумақта жоспарлы күрделі жөндеу жұмыстарын бастады. Биыл төрт участок аралығында 77,862 шақырым темір жол күрделі жөндеу көреді.
Атап айтқанда, Қарауылкелді-Мақат учаскелері мен Жарлы 202-разъезі-Ноғайты аралығындағы 78 шақырымға жуық темір жол толықтай жаңарады.
– Қазіргі уақытта 7,5 шақырымға жуық темір жолда күрделі жөндеу жұмыстары аяқталды. Жұмыс арнайы кестеге сай жүреді. Күрделі жөндеу ағымдағы жылдың қараша айының соңына дейін жүреді деп жоспарлануда. Мердігер компания ретінде талай жылдан бері әріптес болып келе жатқан сенімді компания – «Теміржол жендеу» ЖШС танылған, – деді Ақтөбе магистральдық желі бөлімшесі жол бөлімінің бастығы Бауыржан Хамзин.
Алдағы уақытта Никельтау станциясы, Әйтеке би-Хромтау және Қызылсай-Әйтеке би станциялары аралығындағы темір жолға күрделі жөндеу жүргізіледі.
Құрылысқа пайдаланылатын материалдың барлығы отандық өнім. Теміржолшылардың айтуынша, темірбетонды шпалдар экологиялық таза өнім болып табылады. Күрделі жөндеуден кейін аймақта жолаушылар пойызының жылдамдығын 60 км/сағаттан 90 км/сағатқа дейін көтеру ұсынылып отыр. Яғни жылдамдық көтерілсе, қай жағынан да тиімді де үнемді болмақ.
Күрделі жөндеуден бөлек Ақтөбе магистральдық желі бөлімшесі 16, 427 шақырым жолда орташа жөндеу жұмыстарын жүргізеді. 95 бағыттамалы бұрмаларды ауыстыру жоспарланса, бүгінгі күні 5 жиынтық ауыстырылды. Қазір Қандыағаш, Жұрын, Ақтөбе, Никельтау, Ізімбет, 312, 315, Тоқмансай, Қайдауыл, Бақай станцияларында бұрмалар жаңарту жұмыстары жүріп жатыр.
Сондай-ақ 6,5 км жолда рельсті тіректер жаңарады. Жұрында, Ұлпанда рельсті-шпалды тор ауыстырылады, жол астындағы қиыршық тасы жаңарады. Күрделі жөндеу жүрген телімдерден шыққан жарамды материалдар арқылы басқа жолдардың пайдалану ұзақтығын арттырады. Орташа жөндеу, т.б. жұмыстарды магистральдық желі бөлімшесі өз күштерімен атқарады. Кестеге сай бекітілген жол жұмыстарының бәрі кезең-кезеңмен арнайы техниканы қолдана отырып жүргізіледі.
