Ақтөбе вокзалы 2025 жылы күрделі жөндеуден өтеді

Ақтөбе облысы әкімдігінде теміржол вокзалдары мен әуежайда жолаушыларға қолайлы жағдай жасау және қызмет көрсету сапасын жақсарту мәселесіне арналған жиын өтті.

Ақтөбе облысының әкімі Асхат Шахаровтың қатысуымен өткен жиынға «ҚТЖ-Жүк тасымалы» ЖШС – «Батыс» филиалының директоры Бөріхан Беркімбаев және «ҚТЖ» ҰК» АҚ Ақтөбе магистральдық желі бөлімшесінің және көлік терминалдарының басшылары арнайы шақырылды.  

Жиында Мемлекет басшысының Жолдауында айтылған инфрақұрылымға қатысты өзекті мәселелерді шешуге қатысты тапсырмалар сөз болды. Стратегиялық басымдықтардың бірі – көлік-логистика саласын дамыту. Заманауи әуежайлар мен вокзалдар – бұл тек көлік торабы ғана емес, сонымен қатар кең ауқымды қызмет түрлерін ұсынатын нағыз сервис орталықтары. Әуежайлар мен вокзалдардағы қызметтерді кеңейту – бұл заманауи жағдайларға сәйкес үнемі жетілдіруді қажет ететін үздіксіз процесс. Қызмет көрсету сапасын дамытуға салынған инвестициялар жолаушылар санының артуы және клиенттердің адалдығын арттыра отырып, көлік торабының беделін нығайтумен өзін ақтайтыны айтылды.  

Басқосуда жолаушыларға қызмет көрсету сапасын арттыру, жалпы сервисті дамыту, инфрақұрылым жұмысын оңтайландыру және жолаушыларға қолайлы жағдай жасауға қатысты ұсыныстар талқыланды. Вокзал мен әуежай жұмысына заманауи технологияларды енгізу және қызмет көрсетуді жақсартуға назар аудару қажеттігі айтылды.  

Теміржол басшылары 2025 жылы вокзал ғимаратына күрделі жөндеу жұмыстары жоспарланғанын жеткізді. Қазіргі уақытта жобалық-сметалық құжаттама әзірленуде. Шатыр, инженерлік желілерді, терезелер мен есіктерді ауыстырудан бөлек, ішкі әрлеу жұмыстары, қала және перронға кіреберісті жабдықтау, жарықдиодты ақпараттық тақта орнату және басқа да жұмыстар жүргізіледі.  

Ақтөбе магистральдық желі бөлімшесі директорының орынбасары Болат Аюпов теміржол вокзалындағы қызмет көрсету жұмыстарына тоқталды. Вокзалда жолаушы ағыны көп, тәулігіне 12 пойызды қабылдайды. Негізінен вокзал кешені 900 жолаушыға қызмет көрсетуге қауқарлы. Алайда тәулігіне төрт мыңнан астам адам келіп-кететін вокзал қызметіне айтылатын сын да аз емес.