Маңғыстау теміржолы күрделі жөндеуге күш салуда

Маңғыстау теміржолында биылға жоспарланған жол жөндеу жұмыстары қарқынды жүріп жатыр. Соның ішінде күрделі жөндеу бойынша жұмыс аяқталуға жақын. Биыл түбек теміржолының 15,700 шақырымын күрделі жөндеуден өткізу жоспарланған болса, қазірге дейін соның он шақырымдай аумағына жөндеу жүргізілген.

Маңғыстау магистральдық желі бөлімшесі директорының орынбасары Нұрболат Шалғабайдың айтуынша, биыл жоспарға сай Бейнеу-Сайөтес -№7 бекет аралығындағы жолдар күрделі жөндеуден өтуде. Бірінші кезеңде жолдың 5,8 шақырымы алғашқы жартыжылдықта жөндеуден өтті. Маусым айының екінші жартысынан бастап екінші лектегі күрделі жөндеу басталды. Қазірге дейін 4,100 км жөндеу жұмыстары жүргізіліп үлгерген. Күрделі жөндеудің қалған бөлігі де көп ұзамай бітеді деген болжам бар. Магистральдық желі бөлімшесі директорының орынбасары құрылыс қарқыны осы сарында жалғасса, жолшылар шілде айында күрделі жөндеуді толық аяқтайтынын жеткізді. Айтуынша, бөлімшеде жолдардың сапасын жақсарту бойынша басқа да жөндеу жұмыстары, ағымдағы жұмыстар рет-ретімен жалға сып жатыр. Күрделі жөндеуден шыққан материалдарды екінші деңгейлі жолдарға салып, станциялар басындағы жолдардың жағдайын жақсарту жұмыстары да жүріп жатыр екен.  

– Күрделі жөндеу – жолдағы материалдарды түгел ауыстыруды талап етеді. Ал одан шыққан материалдардың біразы жаңа болмаса да жарамды болуы мүмкін. Біз осы ескі жарамды материалдарды қайтадан пайдаланып, бекеттердің басындағы жолдарды жаңартуға қолданып отырмыз. Бірінші, үшінші бүйірлік жолдарға салып, ағаш шпалдарды темірбетон түріне ауыстырудамыз. №7 бекеттің екі жолына - бірінші және үшінші жолына ауыстырдық. №5 бекеттің бірінші және үшінші жолына да солай салдық. Сайөтес станциясының төртінші жолына қолдандық. Себебі ол жерде бұрын көпір салынғандықтан, содан қалған орынды реттеуге тура келді, – дейді Нұрболат Шалғабай.  

Күрделі жөндеу біткеннен кейін маңғыстаулық жолшылар орташа жөндеу жұмыстарын жүргізуді жалғастырады. Бұл жоспар бойынша 9,7 шақырымды құрайды. Онан басқа бағыттамалық бұрмаларды ауыстыру жоспары да ойдағыдай жүріп жатқан көрінеді. Бейнеу жол дистанциясына 17 бұрма келіп, қазірге дейін 15-і салынған. Маңғыстау жол дистанциясына 4 бұрма келіп, бәрі де салынып үлгерген.  

– Бейнеудегі қалған бұрмаларды шілденің басында орнатып боламыз. Сонымен биыл жалпы 32 дана бағыттамалық бұрманы жаңартамыз. Енді Бейнеуге тағы төртеуі, Маңғыстауға жетеуі келеді деп күтілуде. Сонымен қатар биыл бөлімше бойынша 107 шақырымда мал өтпейтін қоршау салынады. Бейнеу бағытында 53 шақырым болса, қалғаны Маңғыстау жол дистанциясы аумағында орнатылады. Қазір жоспардың орындалғаны 10 шақырым, қалған аумақта құрылыстар жалғасуда, – дейді магистральдық желі бөлімшесінің өкілі.