Қаракеткен – Қараиірім жол теліміне күрделі жөндеу сәтті аяқталды
Қызылорда облысы бойынша меншікті тілші
Қызылорда магистральдық желі бөлімшесіне қарасты жол дистанцияларында жолды жазғы күтім жұмыстары қарқынды жүріп жатыр. Күрделі жөндеу жұмыстарын сапалы да сенімді жол салумен танылған «Integra Construction KZ» серіктестігінің «Батыс» дирекциясы қолға алған.
Сенімді серіктес жолды сауықтыру жұмыстарын бекітілген жоспар шеңберінде атқарып шығуға кіріскен. Биыл Қызылорда жол дистанциясының телімдерінде 36,3 км жолға күрделі жөндеу жұмыстары жүргізіледі.
Күні кеше Қаракеткен – Қараиірім аралығындағы 5,59 км жол теліміне күрделі жөндеу жұмыстары сәтті аяқталды. Бұл учаскеде тозығы жеткен ескі жол үсті конструкциялары толық жаңартылып, заманауи стандарттарға сай отандық өндірістегі су жаңа Р-65 типіндегі рельс тізбектері төселді.
Келесі кезекте Екпінді – Төменарық аралығындағы 8,19 км жол телімінде ауқымды жөндеу жұмыстары басталып та кетті. Күрделі жөндеуге орай белгіленген толаскез мезгілінде жолшылар жұмысқа қызу кірісіп, балласт төсеу, шпалдарды алмастыру, бағыт пен еңіс түзету секілді жұмыстарды технологиялық регламентке сай орындауда.
Жол жөндеу процесінде ауыр жол машиналары: ПЛ, УК, ЭЛБ, ВПО ДГС, ПБМ, ЩОМ типіндегі агрегаттар, түрлі типтегі тракторлар, сондай-ақ механикаландырылған жол слесарларының бригадалары жұмылдырылған. Дистанция басшылығының айтуынша, барлық жұмыс бекітілген кесте мен қауіпсіздік стандарттарына толық сәйкес жүргізілуде.
– Жазғы маусым – жолды күтіп-ұстау мен сауықтыруда шешуші кезең. Апта басында Екпінді – Төменарық теліміндегі 2967 км 7-пикетінен бастап 2975 шақырымның 9-пикетіне дейінгі 8,19 шақырымдық аумаққа күрделі жөндеу жұмыстары басталды. Бұған дейін дистанцияның Қаракеткен – Қараиірім теліміндегі 5,59 шақырымдық жол күрделі жөндеуден өткізілді. Әрбір жөнделген шақырым – теміржол көлігі қозғалысының сенімділігі мен жолаушы және жүк тасымалының қауіпсіздігіне қосылған үлес. Біз үшін сапа мен қауіпсіздік – басты талап, – дейді Қызылорда жол дистанциясының бастығы Марат Оңалов.
Жаздың әр күнін тиімді пайдалануға тырысқан қызылордалық жолшылар мердігер компания жұмысынан бөлек жөндеу түрлерін өз күштерімен атқарып, қоса қабат қимылдауда.
