Қызылорда жол дистанциясында теміржол күтімі қарқынды жүріп жатыр
Қызылорда облысы бойынша меншікті тілші
Қызылорда жол дистанциясында күн сайынғы тірлік тоқтаған емес. Таңғы салқынмен басталған қарбалас жұмыс күннің еңкейген шағына дейін жалғасып, жолшылар жаздың бір күнін бос өткізбеуде.
Марат Оңалов басқаратын Қызылорда жол дистанциясы биыл жоспар бойынша екі учаскеде күрделі жөндеу жұмыстарын жүргізумен қатар, күнделікті жол күтімі жұмыстарын да тұрақты, технологиялық жоспарға сай жүргізіп келеді. Осындай ауқымды жол күтімі кешелі бері Қызылорда станциясының бірінші жолының жанама жолында өткізілуде. Станция жолындағы екі бірдей бағыттамалық бұрмалардың арасындағы басты жолды көтеріп, қиыршық таспен нығыздауда. Дистанция бастығының орынбасары Батыр Мамедалиев пен жол шебері Мақсат Әбдіраманов бастаған бригада екінші тәулік тынымсыз жұмыс істеп жатыр.
Қолындағы шаблонын бір сәтке тастамайтын жол шебері әр өлшемді қадағалап, әр қиыршық тастың дұрыс төселуін бақылауда. «Жолды 60-61 мм деңгейге көтеруіміз керек. Әрбір балласт қабаты нығыздалып, қайта өлшеніп отырады. Бұл – қауіпсіздіктің басты шарты», – дейді ол.
Жолшылардың бірі домкратпен рельсті көтеріп тұрса, бірі балластты нығыздауда. Қиыршық тастар әр учаскеге алдын ала төгіліп, қол құралдарымен ықшамдалып қойылған. Енді сол тастардың астында жолдың берік табаны қаланып жатыр. Пойыздардың қозғалыс қауіпсіздігін қамтамасыз ететін жұмыс болған соң әр әрекет есеппен, әр қозғалыс талаппен орындалуда.
– Қиыршық тастар толық төселіп, нығыздалған соң арнайы жол машиналары іске қосылады. Сол кезде жолдың түпкілікті күтімі жасалып, көтерілген учаске толық пайдалануға беріледі, – дейді жол шебері Мақсат.
Жөндеу жұмыстары кезінде Қызылорда станциясының бірінші жолының оңтүстік алқымындағы жанама жол да көтерілді. Бірнеше сағатқа созылған жұмысқа қарамастан пойыз қозғалысы тоқтаған жоқ. Станция мен парк кезекшілері қозғалысты үйлестіріп, жолаушы мен жүк пойыздарының уақытылы келіп-шығуын қамтамасыз етті.
Дистанция бастығы Марат Оңалов теміржолшылардың еңбегін ерекше атап өтті. Айтуынша, жол көтеру жұмысы – жай ғана жөндеу емес, геометриялық дәлдікті талап етеін күрделі де жауапты жұмыс.
– Жол күтімін жасауда сырт көзге көрінбейтін, бірақ жауапткершілігі күрделі жөндеуге пара-пар жұмыс аз емес. Біздің тәжірибелі жолшылар қандай жұмыстың болсын үдесінен шығып, сапалы атқаратынына күмән жоқ, – деді дистанция бастығы.
