Вокзал – тарихи нысан

Орынбор-Ташкент теміржолының құрылысы басталған 1904 жылы салынып, ғасырдан астам тарихтың куәсі болған Шиелі теміржол вокзалы қазақ даласында салынған алғашқы теміржол тораптарының бірі. Оның бой көтеруі аймақ экономикасының дамуына, ауыл шаруашылығы өнімдерін тасымалдауға және халықтың қатынасын жеңілдетуге айрықша ықпал етті.

Соңғы рет 2012 жылы күрделі жөндеуден өткен ғимарат бүгінде тәулігіне 13 жұп пойызды қабылдап, орта есеппен 263 жолаушыға қызмет көрсетіп келеді. Бұл көрсеткіш аудан үшін айтарлықтай маңызды, себебі жолаушылардың басым бөлігі өңірден облыс орталығына және көршілес аймақтарға сапар шегеді.

Қызылорда облысында теміржол вокзалдарын күрделі жөндеуден өткізу жұмыстары қарқын ала бастады. Аймақ басшылығы мен жауапты мекемелер қолға алған бұл іс тек құрылыс жұмысы ғана емес, сонымен қатар тарихи құндылықты сақтау, жолаушыларға ыңғайлы орта қалыптастыру, теміржол саласының болашағына инвестиция салу болып отыр.

Жуырда облыс әкімі Нұрлыбек Нәлібаев, Парламент депутаттары Наурызбай Байқадамов, Руслан Рүстемов, Мұрат Әбенов, Мұрат Ергешбаев Қызылорда магистральдық желі бөлімшесінің вокзал шаруашылығы жөніндегі орынбасары Нұрлан Бимұратов, вокзал бастығы Алмат Досымов және сала мамандары Шиелі вокзалындағы құрылыс жұмыстарының барысымен арнайы танысты. Жауаптылардың айтуынша, бұл жолғы жөндеудің ерекшелігі-ғимараттың тарихи сәулеттік келбеті толықтай сақталып, заманауи талаптарға сай жаңартылуы.

Мердігер мекеме «Дәнекер» ЖШС ғимараттың ішкі және қасбеттік қаптау жұмыстарын жүргізуде. Бұған дейін аудан әкімдігі вокзал аумағында қосымша жұмыстар атқарып, жолаушылар платформасына қақпа орнатқан, ескі су мұнарасын қалпына келтірген, сондай-ақ жарық шамдар мен орындықтар қойылған. Бұл өз кезегінде сапарға шыққан жолаушылардың жайлылығын арттыра түсті.

Қазіргі таңда «ҚТЖ» ҰК» АҚ тарапынан республика көлемінде 100 вокзалға күрделі жөндеу жүргізу жобасы қолға алынған. Соның ішінде Қызылорда бөлімшесіндегі 10 станцияның вокзалдары жаңғыртылуда. Бұл -бір мезгілде әлеуметтік, экономикалық және мәдени маңызы бар қадам.

«Бұған дейін Қызылорда вокзалы жөндеуден өткізіліп пайдалануға берілген болатын. Бүгінде жүргізіліп жатқан вокзалдардың құрылыс жұмыстары да жоспарға сәйкес биыл аяқталып, пайдалануға беріледі. Қазіргі таңда жөндеуден өткізіліп жатқан Сексеуіл, Арал теңізі, Қазалы, Жосалы, Төретам, Шиелі, Жаңақорған вокзалдарының Тереңөзек, Жалағаш Талап станцияларындағы жолаушыларға қызмет көрсету пунктеріндегі тарихи бейнесі сақталып, бастапқы архитектуралық құндылықтары жоғалмайды. Жаңғырту жұмыстары аймақтың көлік инфрақұрылымын нығайтуға бағытталған маңызды шара. Аймақтағы өзге вокзалдардың жөндеу барысын қарап шыққан аймақ басшысы бастаған топ бүгін Шиелі вокзалын арнайы барып қарап шығып тапсмырмалар берді, - деді Қызылорда магистральдық желі бөлімшесінің вокзал шаруашылығы жөніндегі орынбасары Нұрлан Бимұратов.

Жөндеу жұмыстары жүріп жатқанына қарамастан, пойыздар кестеге сәйкес кідіріссіз қабылданып, жөнелтілуде. Жолаушылардың перронға шығып, вагондарға мініп-түсуіне барлық жағдай қарастырылған. Бұл ұйымдастыру жұмыстарының дұрыс жолға қойылғанын көрсетеді.

Теміржол вокзалдарының жаңаруы тек аймақ тұрғындары үшін ғана емес, бүкіл облыстың туристік және транзиттік әлеуетін арттыруға мүмкіндік береді. Заманауи талаптарға сай қызмет көрсету, жолаушыларға қолайлы жағдай жасау -халықтың теміржолға деген сенімін нығайтып қана қоймай, теміржол саласын жаңа деңгейге көтереді.

Сонымен қатар, тарихи ғимараттарды сақтай отырып жаңарту ұлттық мұраны келер ұрпаққа жеткізудің жарқын үлгісі. Шиелі сияқты ғасырдан астам тарихы бар вокзалдардың қайта түлеуі аймақтың мәдени келбетіне де оң ықпал етеді. Осылайша, аймақта басталған күрделі жөндеу жұмыстары тек құрылыс емес, аймақтың тарихын сақтап, болашағын бекемдейтін іргелі бастама.