Вокзалдар қалай жаңғыртылуда?
«Қазақстан теміржолшысы» газетінің тілшісі
Қазір елімізде 301 вокзал болса, соның ішінде жаңадан салынған 20-25 вокзал жөндеуді қажет етпейді, ал қалғанына күрделі жөндеу жұмыстары керек. Жарамсыз болып қалған бірқатары сүріліп, орнына жаңасын салу қажет. Бұл жұмыстарды 2 жылда атқару жоспарланған.
«Магистраль» сарапшылар форумы алаңында «Вокзалдар – елдің айнасы: жолаушылар үшін олардың келбеті қалай өзгереді?» тақырыбында пікірталас өтті. Іс-шара барысында вокзалдарды жаңғырту ісі қалай жүзеге асып жатқаны талқыланды.
– Бұл бүгінде өте өзекті тақырып. Вокзалдардың көбі өткен ғасырдың 50-жылдарында тұрғызылған. Сондықтан тозу деңгейі де жоғары. Оларға бұған дейін түрлі деңгейде жөндеу жұмыстары жүргізіліп келді. Дегенмен бүгінгідей ауқымды жаңғырту жұмыстары бұрын-соңды болмаған. Осы жылға дейін аталған вокзалдардың тоғызы жергілікті атқарушы биліктің құзырында болып келді. Оның үшеуі, яғни Шымкент, Екібастұз және Павлодар вокзалдары жөндеуден өткен. Олар әлі де сол әкімдіктерге қарайды. Қалған алтауы сенімгерлікпен ҚТЖ-ға өтті. Жаңғырту жұмыстары халықаралық стандарттарға сай жүргізіледі. Қазіргі вокзалдардың көбі сол талаптарға сай келмейді, соның бәрі реттеледі, – деді «ҚТЖ» ҰК» АҚ вокзал шаруашылығын пайдалану және дамыту жөніндегі атқарушы директоры Жұбан Көрпебаев.
Жаңғырту жұмыстары екі кезеңге бөлініп жүргізіледі, бірінші кезеңінде 125 вокзал, екінші кезеңінде 152 вокзал жөнделеді. Бірінші кезеңде вокзалдар туристік, тозу деңгейі, жолаушылар ағыны бойынша ерекшеліктеріне қарай жөнделеді.
– Барлық вокзалдар жұмыс біткен соң мемлекеттік сараптамадан өтеді. Сондықтан мердігер ұйымдарға қойылатын талап та жоғары. Жөндеу жұмыстарын жобалау вокзалдарды салудың бірыңғай стандарттарына қарай жасалады, әр өңірдің бірегейлігі де ескеріледі. Вокзалдардың ішінде мемлекеттік тарихи ескерткіштер қатарына кіретін ғимараттар да бар, оларға бөлек реставрациялау компаниялары қызмет көрсетеді, – дейді «ҚТЖ» ҰК» АҚ құрылыс жөніндегі басқарушы директоры Марат Искалиев.