Ақсу вокзалы жаңартылып жатыр
«Қазақстан теміржолшысы» газетінің тілшісі
Павлодарға қарасты Ақсу станциясының вокзалында жөндеу жұмыстары қарқынды жүріп жатыр.
Жоба облыстық бюджет есебінен іске асырылуда. Жаңарған вокзал жыл соңында жолаушылар игілігіне тапсырылуы керек. Өңірлік жолаушылар көлігі және автокөлік жолдары басқармасының дерегінше, барлық жұмыстар ҚТЖ-мен келісе отырып жүргізілуде.
Мұнда перрон алаңын абаттандыру, платформаны жаңғырту, халықтың қозғалысы шектеулі топтары үшін вокзалды бейімдеу, бөлмелердің ішкі әрлеу жұмыстары қарастырылған. Сондай-ақ ғимараттың сыртын қаптап, бұрынғыдан жылы ету көзделген.
– Ақсу қаласының вокзалы 1982 жылы бір қабатты етіп салынған. Содан бері күрделі жөндеу көрмеген. Қазіргі уақытта мұнда реконструкция және жаңарту жұмыстары жүргізіліп жатыр. Жұмыстардың шамамен 20%-ы аяқталды. Алдағы уақытта Қалқаман, Шідерті, Бозшакөл және Қарасор елді мекендеріндегі шағын вокзалдарды да жаңарту көзделіп отыр, – дейді Өңірлік жолаушылар көлігі және автокөлік жолдары басқармасының басшысы Қанат Қашкиров.