Жаңа жолдың тиімділігі неде?

«Достық-Мойынты» теміржол жобасының тиімділігі туралы «ҚТЖ» ҰК» АҚ Ірі жобаларды іске асыру жөніндегі дирекциясы филиалының директоры Еркін Мейірбеков 24 кz телеарнасына берген сұхбатта айтып берді.

– Қазіргі таңда Қытай мен Еуропа арасындағы сауданың жылдан жылға ұлғайып бара жатқанын көріп отырмыз. Осы аралықтағы тасымалды жүзеге асыру кезінде өтуі қиындау жерлердің бірі осы «Достық-Мойынты» телімі еді. Сол сауда процесін, транзиттік тасымалды жақсарту үшін аталған телімде екінші жол салынды. Бұрын осы аралықта тәулігіне 12 жұп жүк пойызы жүрген болса, қазір бұл көрсеткіш 60 жұп пойызға дейін артты. Жаңа жол арқылы жүк жылдам жетеді. 2030 жылға таман контейнерлік пойыздардың жылдамдығы тәулігіне 1500 шақырымды құрайды деп жоспарлап отырмыз. Одан бөлек Достық станциясын жаңғырту жұмыстары іске асырылды. Соның арқасында екі жақтан өтетін жүктердің кедендік ресімдеу жұмыстарының мерзімі қысқарды, – дейді спикер.  

Оның айтуынша, жобаны іске асыру барысында бірнеше цифрлық жобалар жүзеге асырылды. Атап айтқанда, «Автоматты бұғаттау» жаңа жүйесі орнатылды. Станция жұмысын оңтайландыру кезінде цифрлық жүйелер қолданылып, соның нәтижесінде қазіргі таңда жүктер мейлінше аз уақытта өңдеп, жөнелтіледі.  

Жобаның мультипликативті әсері туралы да баяндаған Еркін Мейірбеков оны салу барысында қатарынан көптеген салалар дамығанын жеткізді. Атап айтқанда, металлургия, бетон зауыттары, басқа да қосымша салалар осы жобаға тартылып, өндірістері дамуы арқылы табысы көбейді. Жаңғырту жұмыстары Достық пен Мойынты станциялары арасындағы 32 бекеттің бәрінде жүзеге асырылды. Мұндай үлкен құрылыс темір жолда соңғы рет 2017 жылы Алматы мен Шу станциялары арасында екінші жол құрылысы жүрген кезде болған. «Достық-Мойынты» екінші жолын салу барысында құрылысшылардың үлкен пулы құрылған. Сол арқылы қазіргі таңда басқа да ірі теміржол жобалары іске асырылуда.  

Спикердің пайымдауынша, «Достық-Мойынты» жобасының мерзімінен бұрын жүзеге асырылуының басты себебі – оның маңыздылығын түсіне отырып құрылысқа ел болып атсалысуында. Нормативтік мерзімінен ерте біткен инфрақұрылымдық жоба сонымен қатар дұрыс жобалау мен алдын ала дайындықтың арқасында жылдам атқарылды.