Қандыағаш станциясында күрделі жөндеу жоспары толық аяқталды

Биылғы он айда Қандыағаш станциясы бойынша теміржол желісінде ауқымды жөндеу жұмыстары жүргізілді. Бұл шаралар пойыз қозғалысының қауіпсіздігі мен сапасын арттыруға бағытталған.

Қандыағаш жол дистанциясының өндірістік-техникалық бөлім басшысы Сәния Блимованың айтуынша, жол жөндеу жұмыстары өнімді жүрген. Соның ішінде күрделі жөндеу жоспары толық орындалды. Жыл басында бекітілген жоспар бойынша 19,045 км теміржол желісін күрделі жөндеуден өткізу көзделген. Бұл жұмыс 100% орындалып, жоспарланған межеге толық жетті.  

Атап айтқанда, ПЧ-6 учаскесіндегі «Кенжалы-Разъезд 142» аралығындағы 133-143 км және «Разъезд 174-Жарлы» 178-188 км аралығындағы жолдарда күр делі жөндеу кестеге сай уақытылы жүргізілді. Бұл учаскелер соңғы күрделі жөндеуді сонау 1985-1986 жылдары көрген болатын. Ескірген рельс пен шпалдар жаңа P65 SKL маркалы элементтерге ауыстырылып, балласт негізі жаңартылып, жол табаны қайта жаңғыртылды.  

Дистанцияда күшейтілген орташа жөндеу жұмыстары да жүріп жатыр. Шпал және бағыттамалық бұрмаларды жаңарту жұмыстары да қат-қабат атқарылуда. 10 км көлеміндегі шпалдарды жаңарту жыл соңына дейін аяқталады. Ал бағыттамаларды ауыстыру жоспардан артық атқарылды. Жоспардағы 7 дана орнына 24 дана бұрма жаңартылды.  

«Негізгі жөндеу жұмыстары Жаңасай, Қандыағаш және Ноғайты станциялары аумағында жүргізілді. Бұл учаскелерде қозғалыс қауіпсіздігін арттыру және жол төсемінің тозуын төмендету басты назарда болды», – дейді Сәния Блимова.  

Жол жөндеу жұмыстары жыл соңына дейін жалғасып, барлық жоспарланған жұмыстар толық орындалады деп күтілуде. Бұл аймақтағы жүк және жолаушы тасымалын тұрақты әрі қауіпсіз ету жолындағы маңызды қадам болумен қатар, жүк және жолаушылар пойызының жылдамдығын да арттыратын болады.