Инфрақұрылым талапқа сай ма?

Ақтөбе магистралдық желі бөлімшесінде көктемгі тексеріс басталды. Тиісті мамандардан құрылған комиссия станциялар мен жол бойының техникалық жағдайын кешенді түрде бақылауға алды.

Алғашқы күні Жіңішке, Ақтөбе-1 және Ақтөбе-2 станциялары аралығын толық аралап шыққан комиссия мүшелері жол жағдайын,ғимараттар мен техникаларды мұқият қарап шықты. Ақтөбе жол дистанциясының бас инженері Жәнібек Елғондин арнайы бекітілген кестеге сай жылына екі рет, көктемде және күзде өткізілетін байқау өз кезегінде бүкіл шаруашылықты сын тезінен өткізетін емтихан іспетті. Теміржол инфрақұрылымының техникалық жағдайын бағалау, пойыздар қозғалысының қауіпсіздігін арттыру және еңбек, техника мен өрт қауіпсіздігі талаптарының сақталуын қамтамасыз ету назарға алынады.  

– Тексеріс барысында анықталған кемшіліктер негізінде қажетті материалдар көлемі есептеліп, нақты жұмыс жоспары бекітіледі. Жолдың әр бөлігі мұқият қаралып, рельстердің тозуы, шпалдардың жарамдылығы, бекітпелердің беріктігі секілді маңызды көрсеткіштер назарға алынды. Анықталған ақаулар бойынша нақты жоспар жасалып, оларды жою жұмыстары жүргізіледі. Бұл өз кезегінде жолдың сапасын жүйелі түрде бақылауға және уақытылы жөндеуге мүмкіндік береді, – деді Жәнібек Елғондин.  

Ақтөбе жол дистанциясының жол шебері Сайран Бақбергеновтің жауапкершілігіндегі 6-телімнің күтімі талапқа сай деп бағаланды. Тек бірнеше ескерулер айтылды. 24 жылдық тәжірибесі бар маман кейбір ақауларды бірден жоюға болатынын, ал күрделірек жұмыстар қосымша уақытты қажет ететінін жеткізді. Сонымен қатар қажетті материалдар сұраныс арқылы алынып, жолдың қауіпсіз күйде болуы қамтамасыз етіледі.

– Тексеріс кезінде жол ені, рельстердің тозу деңгейі, шпалдардың жарамдылығы және бекітпелердің жағдайы мұқият қаралуда, бұл жолшылар үшін жазғы тасымал алдында үлкен сын, - дейді жол шебері.  

Көктемгі тексеріс жұмыстары аймақта 29 мамырға дейін жалғасады. Бұл аралықта Жайсаң бағытына дейінгі учаскелер толық қамтылады.