Бекеттердің жолы жаңартылып, жүк тасымалы ұлғаяды

Түбек темір жолында бекеттер мен станциялар жолдарын жаңғырту қарқын алған. Мәселен, Бейнеу – Маңғыстау учаскесінің сегіз бекеті осындай жаңғыртудан өтпек.

Нәтижесінде пойыздарды өткізу қабілеті артып, бұл көрсеткіш 12-ден 17 жұп пойызға дейін ұлғая түспек. 

Жоба Мемлекет басшысының көлік-логистика әлеуетін дамыту жөніндегі тапсырмалары аясында өткен жылы қолға алынып, құрылыс жұмыстары басталған еді. Қазір Бейнеуде «Б» паркін, №2,4,6,10,12,13,15 бекет станцияларында қабылдау-жөнелту жолдарын салу және қолданыстағы жолдарды ұзарту жұмыстары жалғасып жатыр. Тарқатып айтсақ, 1050 метрден кем болмаған қабылдау-жөнелту жолдары, Бейнеу «Б» паркінде жеті жол, №2, 6, 10, 12 бекеттерде бір жолдан салынған. Қолданыстағы жолдарды ұзарту жұмыстары №2,4,6,10,12,13,15 бекеттерінің теміржол нысандары бойынша жүргізілген. 

Маңғыстау магистральдық желі бөлімшесінің инфрақұрылымды дамыту бөлімінің бастығы Болат Абатаевтың айтуынша, бүгінде түбек теміржолындағы станция жолдарының ұзындығы өтіп жатқан вагондар санына толық жеткілікті. Дегенмен жоғарыда аталған жоба бойынша алдағы уақыттағы жүк тасымалы мүмкіндіктерінің артуына байланысты жолдар жаңғыртуды қажет етеді. 

– Қазір біздегі станция жолдарының ұзындығы 57-58 шартты бірлік және ол вагондар санын еркін сыйдыра алады. Бұл жобаның жалпы мақсаты контейнерлік ұзартылған жүк пойыздарын кедергісіз өткізу болғандықтан болашақтағы жүк тасымалының артуын, контейнерлік пойыздардың көбеюін ескеріп, станция жолдарының барлығын ұзартуды жоспарлап отырмыз. Қосымша жолдарды салып, сыйымдылығын 71 шартты бірлікке дейін жеткіземіз. Осы жұмыстар «Теміржол жөндеу» ПМС жауапкершілігі шектеулі серіктестігінің күшімен жасалып жатыр. Құрылыс-жөндеу жұмыстарына жүзден астам адам, бірнеше мамандандырылған техника тартылған. Оның ішінде төрт автокран, бір жол төсейтін кран, сегіз жол төсемін жасайтын техника мен 14 автокөлік бар, – дейді Болат Абатаев. 

Сондай ақ ол Бейнеу – Шалқар аралығында жартылай автоблоктау жабдығын толық автоблоктау жабдығына ауыстыру үшін 268 км траншея қазылып, кабель төсеу жұмыстары да жүргізіліп жатқанын айтады.