Ақтөбе вокзалында жолаушыларға барлық жағдай жасалады

Ақтөбедегі теміржол вокзалы жолаушыларға барынша қолайлы әрі технологиялық нысанға айналмақ. Онда Face ID жүйесі, эскалатор, панорамалық лифт, душ кабиналары мен коворкинг орталығы болады.

Ақтөбе қаласындағы теміржол вокзалын реконструкциялау жұмыстары қарқынды жүріп жатыр. Жолаушылар қолайлы заманауи инфрақұрылым игілігін биылдан бастап көре алады. Нысанның қасбеті, инженерлік желілерін жаңарту жұмыстары аяқталды. Қазіргі уақытта зал мен әкімшілік бөлмелерге күрделі жөндеу жүргізіліп жатыр.  

Жоба бойынша басты залға жаңа эскалаторлар орнату және мүмкіндігі шектеулі азаматтарға арналған панорамалық лифт қойылады. Сондай-ақ касса аймақтары толық жаңартылып, заманауи коворкинг орталығы мен балалар ойын алаңы ашылатыны айтылды. Күту залы да жаңаша форматта жабдықталып, жолаушылар үшін барынша жайлы жағдай жасалмақ.

Сонымен қатар вокзалда санитарлық жағдайды жақсартуға да ерекше көңіл бөлінген. Реконструкция барысында қоғамдық дәретханадағы желдету және кондиционерлеу жүйесі толық ауыстырылды. Санитарлық тораптар жөнделді. Ерлер мен әйелдер бөлімдеріне жаңа душ кабиналары да орнатылды. Бұл – аяқталған жұмыстар.  

Қауіпсіздік мәселесі де назардан тыс қалмаған. Алдағы уақытта вокзалға заманауи тексеру жабдықтары мен бет-әлпетті тану функциясы бар бейнекамералар қойылып, бақылау жүйесі толық жаңартылады.  

Сонымен қатар жоба аясында перрон қайта жөнделіп, асфальт-бетон жабыны ауыстырылатыны сөз болды. Аумағы абаттандырылып, көгалдандыру жұмыстары жүргізіледі.