Мобильді топ: мониторинг не дейді?

Ұлттық компанияда мобильді топтар ресімделмеген жүктер мен билетсіз жолаушыларды анықтауда тұрақты түрде рейдтер өткізумен айналысып келеді. Өткен 4 айда мобильді топтар 1329 пойызды тексеріп, 29 билетсіз адам мен 8180 кг ресімделмеген жүк багажын анықтаған.

Анықталған кемшіліктер бойынша материалдар кінәлілерге қатысты тәртіптік шара қабылдау үшін «Жолаушылар тасымалы» АҚ мен көліктік бақылау инспекциясына жолданған. 

«ҚТЖ» ҰК» АҚ корпоративтік қауіпсіздік қызметінің бастығы Құрман Елубаевтың айтуынша, пойыздарға рейд жүргізу барысында вагондарға техникалық қызмет көрсету және техникалық жағдайына қатысты талаптардың бұзылуы, сонымен қатар жиналмалы жұмсақ төсек орындардың стандарттарға сай еместігі, жолаушылар пойыздарының тазалығы мен санитарлық-гигиеналық құралдармен қамтылуы тұрғысында кемшіліктер анағұрлым жиі кездеседі.  

– Негізгі техникалық мәселелер қатарына пойыздарда ауа желдеткіш жүйенің, тоңазытқыштың, қысқа толқынды пештің, ауыз су диспенсерінің, титан электр қыздырғышының жоқтығы немесе дұрыс жұмыс істемеуін жатқызуға болады. Сонымен қатар кемшіліктердің көбі қай өңірге тән деген сұраққа келсек, осы өткен 4 айда ресімделмеген тұлғалар мен жүк багажын тасымалдау бойынша анағұрлым көп акті «Оңтүстік» өңірлік аймақтық бөлімшелері бойынша жасалды, – дейді Қ. Елубаев. 

Пойыздарды тексеруге мобильді мониторинг топтарының 23 қызметкері 2-3 адамнан бөлініп шығады. Олар Алматы, Тараз, Атырау, Маңғыстау, Семей, Шымкент, Қызылорда, Ақтөбе облыстары мен «Жолаушылар тасымалы» АҚ-ның өңірлік филиалдарының Орталық телімі бойынша бөлінген. 

– «Алматы-Атырау» пойызында ресімделмеген багаждың анықталғаны туралы айтсақ, биыл 29 сәуірде Шымкент-Түркістан телімінде «Алматы-2-Атырау» бағытында қатынайтын №41 пойызды тексеру барысында 4 жолаушылар вагонында жалпы салмағы 884 келі ресімделмеген багаж анықталған. Бұл факті бойынша біз пойыз бригадаларын жауапкершілікке тарту туралы 4 акті толтырдық, – дейді Қ. Елубаев. «Жолаушылар тасымалы» АҚ басшылығы аталған вагон жолсеріктеріне қатысты ҚР Еңбек кодексіне сәйкес еңбек келісімшартын бұзды.