Тәуелсіздік күніне орай қызылордалық үздік теміржолшылар марапатталды
Қызылорда облысы бойынша меншікті тілші
Тәуелсіздік мерекесіне орай қызылордалық үздік теміржолшылар бөлімше мен кәсіподақ ұйымы басшылығының түрлі марапаттарына ие болды.
Салтанатты жиында бөлімше басшысы Батырхан Базарбаев әріптестерін мерекемен құттықтап, оларға аймақ темір жолының дамуына қосып отырған еңбектері үшін алғыс айтты. Барлық мекемеде сала үздіктері құрметке бөленіп, бірі бағалы сыйлыққа қол жеткізсе, екіншісі басшылықтың арнайы марапатын еншіледі. Дәстүрлі құндылықтар дәріптеліп, тәуелсіздікке жол ашқан желтоқсандықтарға тағзым етіліп, елдік пен ерлік ұлықталды.
Қазалы белгі беру және байланыс дистанциясында бірнеше теміржолшыны зейнет демалысына шығарып салу рәсімі ұйымдастырылса, Қызылорда жол дистанциясының жолшылары бақилық болған әріптестерін еске алып, құрбандық шалды. Өткенге салауат айтылып, болашаққа сенім нығая түсті.