Ақтөбеде тәлімгерлік курсы өтті
Ақтөбе облысы бойынша меншікті тілші
Ақтөбеде бірнеше компания өкілдерінің қатысуымен дуальды оқытуды енгізудің жол картасы талқыланып, біліктілікті арттыру, тәлімгерлер дайындау бойынша арнайы курс өтті.
Шара барысында өндірісте тәлімгерлік дәстүрді дамытқан теміржолшылар өзге компаниялар алдында тәжірибелерімен бөлісті. Шара өңірлік «Атамекен» кәсіпкерлер палатасында екі күндік курс аясында ұйымдастырылды. Оған Ақтөбе бойынша 20 компаниядан 30 адам қатысуға өтінім берген. Олардың қатарында «ҚТЖ» ҰК» АҚ филиалы – Ақтөбе магистральдық желі бөлімшесі мен «Вагонсервис» АҚ Жолаушылар вагондарын жөндеу жөніндегі Батыс филиалының қызметкерлері бар. Курсқа өндіріс орындарында жас мамандарды тәжірибеден өткізетін тәлімгерлер дайындау негіз болды. Үш жылдан бері тұрақты өтіп келе жатқан курста бұл жолы теміржолшылар белсенділік көрсетті. Өйткені теміржол саласында тәлімгерлікті дамытудың тамаша мектебі қалыптасқан.
«Вагонсервис» АҚ кадр бөлімінің басшысы Есенғали Таутұрмашев тәлімгерлік – кадр дайындау қызметіндегі күрделі мәселелердің бірі екенін жеткізді. Жұмысқа қабылданған жас мамандарды өндіріске икемдейтін арнайы тәжірибелі тәлімгерлердің болуы үлкен мектеп екенін айтты. Жас маманды дайындап, өндірісті оқытқаны үшін тәлімгер 10 пайыз жалақыға қосымша ақы алады екен.
Курста тәлімгерлік жүйесінің қыр-сыры үйретілді. Яғни тыңдаушылар өзгеге үйретпес бұрын алдымен өздері тәлімгерлік білім-біліктерін шыңдайды. Жоба кәсіпкерлер палатасында 2021 жылдан бастап жұмыс істеп келе жатқан «Тәлімгерлік мектебі» оқыту бағдарламасы аясында жүзеге асырылып жатыр. Осы уақыт ішінде көлік, тамақтану, қызмет көрсету, тау-кен, өңдеу өнеркәсібі кәсіпорындарының 102 тәлімгері оқытылған екен. Бұл кадрлық әлеуетті нығайтуға және өндірісті дамытуға әсер етеді дейді мамандар.