Анар Жалғасбаева: «Әр еңбек адамы мен үшін қымбат»
Атырау облысы бойынша меншікті тілші
Персоналды басқару, яғни кадр бөлімінің басшысы – қандай да бір кәсіпорындағы негізгі мамандық. Қызметкерді жұмыс орнына қабылдау, ауыстыру, жұмыстан босату, біліктілігін арттыру, марапатқа ұсыну, тағы басқа жұмыстар оның функционалды міндеті болып саналады. Анар Жалғасбаева Атырау магистральдық желі бөлімшесінде 18 жылдан бері осы қызметті абыроймен атқарып келеді.
Әрине, темір жол, соның ішінде магистральдық желі көп тармақты мекеме, құрылымдық бөлімдері де аз емес. Оның әрқайсысында жүздеген адам еңбек етеді. Сондықтан әр жұмысшыны бағалау, олардың ұсыныс-талаптарын қанағаттандыру, әркімнің қадір-қасиетіне жете білу үлкен біліктілікті, сыйластықты қажет етеді. Құрылымдық кадр бөлімі басшыларымен тығыз қарым-қатынас орнату да маңызды.
– Жұмысқа келгенде үйдің тірлігі ысырылып қойылады да, жан-тәніңмен сан-салалы өз міндетіңе кірісесің. Кадр жұмысы тек жұмысқа қабылдау не шығарумен шектелмейді, сол екі арада неше түрлі жағдайлар болып жатады. Алға басқанды көтермелеу, қалып бара жатқанына демеу бола білу де қажет. Өйткені теміржолшы болу қауіпті де жауапты жұмыс екенін түсінемін. Сол себепті әр еңбек адамы мен үшін қымбат, – дейді ол.
Анар Амантайқызы Атырау мұнай-газ институтын «Экономика және менеджмент» мамандығы бойынша бітіріп, темір жолдағы еңбек жолын есепшіліктен бастаған. Содан жетекші инженер, салық бөлімінің бастығы, персоналды басқару бөлімінің менеджері, кейін басшысы болып күні бүгінге дейін еңбек етіп келеді. «Үздік маман», «Адал еңбегі үшін» төс белгісінің, «Үздік басшы» дипломының иегері, басқа да марапаттары аз емес. Биыл «Мамандығым – тағдырым» байқауына да қатысты. Төрт баланың анасы. «8 наурыз мерекесінде жыл сайын қыз-келіншектерді марапаттап, қуантуға тырысамыз. Зейнеткер аналар да ұмыт қалмайды. Баршасы да жүздерінен күлкі кетпей, әрдайым шуақ боп шашыла бергей. Мереке құтты болсын!» дейді Анар.