Апат айтып келмейді...
Өкінішке орай, темір жолдың бойында болатын түрлі қайғылы жағдайлар қатары артпаса, кемімей отыр. Теміржолшылар да әрине қол қусырып қарап отырған жоқ, бұл бағытта жүргізіліп отырған профилактикалық шаралар да аз емес.
Әйтсе де, теміржолда қараусыз жайылған мал, өткелдегі жол-көлік оқиғасы, адам өлімі жыл сайын қайталанып келеді. Ағымдағы жылы 15 маусым күні Түркістан – Арыс аралығындағы 3102 шақырымның 10 пикетінде 2 жасар нәрестені ТЧЭ-33 локомотив пайдалану депосының машинисі басқарған №22 Қызылорда – Семей бағытындағы жолаушылар пойызы қағып кетті. Оқиға сағат кешкі 19:34 шамасында болып отыр. Қайғылы оқиға орнына ең алғаш барғандардың бірі ПЧ54 Арыс жол дистанциясының телім бастығы Жұманов Үсен Сәбетұлының айтуынша, зардап шеккен нәресте Түркістан қаласындағы қазақ-түрік клиникасына жедел-жәрдеммен шұғыл жеткізілсе де екі жасар Қазынаның өмірін дәрігерлер ажалдан арашалап қала алмады. Апат болған жерде қоршау бар, бірақ әдеттегідей жергілікті халық кез келген жерден қоршауды бұзып, жол салып алған. Яғни дүкенге баратын төте жолда сол болғандықтан ер адам қоршаудың бұзылған тұсымен келе жатқан пойыздың алдын кесіп өтеді. Әкесінің артынан жүгірген екі жасар бүлдіршінді пойыз қағып кеткен.
Мұндай қайғылы жағдайларға жол бермеу үшін Арыс жол дистанциясы тарапынан барлық мүмкіндіктер жасалуда. Еңбек ұжымдарында, оқу орындарында, темір жолға жақын орналасқан елді мекен тұрғындарымен кездесулер өткізіліп, түсіндіру жұмыстары үздіксіз жүргізілуде. Әрине жолдан өткенде қарапайым қауіпсіздік ережелерін сақтамай, өрескел бұзудың салдары осындай қайғылы жағдайға әкеледі.