Өзбекстан мен Қазақстан теміржолшылары мен кеденшілері халықаралық жүк қатынасында қағазсыз орта құруға ниетті
Бейне-конференц-байланыс форматында «Қазақстан темір жолы» ҰК» АҚ және «Узбекистон темир йуллари» АҚ басшыларының Қазақстан Республикасы Қаржы министрлігінің Мемлекеттік кірістер комитеті мен Өзбекстан Республикасының Мемлекеттік Кеден комитетінің өкілдерін шақыра отырып, кеңесі болып өтті.
Қатысушылар Қазақстан Республикасы аумағына әкелінетін жүктер туралы электрондық деректермен алмасу, тасымалдаушылардың ақпараттық жүйелерін одан әрі интеграциялау, сондай-ақ кеден органдарымен өзара іс-қимыл мәселелерін талқылады.
Кездесуде ҚТЖ өндірістік процестер жөніндегі басқарушы директоры Бауыржан Орынбасаров Қазақстан мен Өзбекстан арасындағы теміржол көлігімен жүк тасымалы өсімінің оң серпінін атап өтті. 2023 жылдың 9 айында тасымалдау көлемі 23 млн тоннаны құрады, бұл 2022 жылдың ұқсас көрсеткішінен 24% жоғары. Өзбекстанға экспорт 30% өсіп, 9,8 млн тоннаға жетті. Астық экспорты 30% (2,6 млн тонна), көмір экспорты 2 есе (2,1 млн тонна) өсті.
Қазіргі уақытта екі ел теміржолшылары теміржол жүкқұжаты және тауарға ілеспе құжаттардың көшірмелерімен жүктерді тасымалдау бойынша электрондық деректер алмасуды жүзеге асырады.
Қағазсыз тасымалдауды ұлғайту үшін халықаралық жүк қатынасында кеден органдарымен және тасымалдаушылармен электрондық өзара іс-қимыл жүзеге асырылады.
Транзиттік тасымалдарда тасымалдау құжаттарының электрондық алмасуын пайдалану жүк жөнелтушілер мен жүк алушыларға айтарлықтай экономикалық әсер етеді, жүктерді тасымалдауды жылдамдатып, құжаттарды ресімдеуді жарты сағатқа дейін жеделдетеді және түйіскен мемлекетаралық пункттер арқылы қабылдауды/тапсыруды арттырады.