Италиялық инвесторлар шақырылады
«Қазақстан теміржолшысы» газетінің тілшісі
Көлік-логистика – Италия мен Қазақстан арасындағы ынтымақтастықтың тағы бір өзекті саласы. Қазақстан өңірлік хабқа айналу үшін Транскаспий халықаралық көлік бағытын дамытуды белсенді түрде қолға алды. Бұл туралы Қазақстан Президенті Қасым-Жомарт Тоқаев Римге ресми сапары аясында Италияның бизнес-қоғамдастық өкілдерімен кездескенде мәлімдеді.
Дөңгелек үстелге халықаралық деңгейдегі 30-ға жуық компания қатысты. Осы жиында Мемлекет басшысы Қазақстанның көлік саласындағы, соның ішінде теміржол бағытындағы жоспарымен таныстырды.
– Орта дәліз «Бір белдеу, бір жол» бастамасын толықтырады. Біз оны Еуропа Одағының Трансеуропалық көлік желісімен және «Жаһандық қақпа» стратегиясымен ұштастыруды көздеп отырмыз. Сонымен қатар «Үлкен жетіліктің» Жаһандық инфрақұрылым және инвестициялар саласындағы серіктестігі (PGII) жөніндегі бастамасын қолдаймыз. Соңғы 15 жылда Қазақстан көлік инфрақұрылымына 35 миллиард доллардан артық қаржы құйды. Алдағы үш жылда 1300 шақырымнан астам теміржол желісін салуды жоспарлап отырмыз. Бұл Қытай, Оңтүстік Азия және Еуропа бағыттарындағы тауар тасымалын ұлғайтуға мүмкіндік береді. Сондықтан италиялық инвесторларды біздің айлақтарымызды дамыту, жүк тасымалдаушы кемелерді бірлесе шығару және логистикалық орталықтар құру ісіне белсенді атсалысуға шақырамыз, – деген Қазақстан Президенті екі ел арасындағы әуе көлігі бойынша бағыттарға да тоқталды.
Мұның бәрі қос елдің арасындағы экономикалық қатынастар мен байланысты нығайтуға, сондай-ақ туризмді ілгерілетуге оң септігін тигізетінін атап айтты.