Белсенді жастар марапатталды
"Қазақстан теміржолшысы" газетінің Жамбыл облысындағы меншікті тілшісі
«ҚТЖ-Жүк тасымалы» ЖШС Жамбыл бөлімшесі филиалы өз міндеттерін жауапкершілікпен атқарып жүрген бір топ белсенді жастарды марапаттады.
Жамбыл бөлімшесі филиалының директоры Айдын Сеитбенбетов бөлімшеге қарасты құрылымдарда өз ісіне жауапты, еңбекте озат, түрлі қоғамдық жұмыстарда белсенділігімен көзге түскен жас мамандар бар екенін айтады. «Жас мамандардың жеткен жетістіктерін көрсетіп, марапаттап отыру оларды ынталандырады», – дейді.
Олар былтыр жыл соңында Астана қаласында өткен ХІІ республикалық жастар форумына қатысып қайтқан. Форумда Жамбыл бөлімшесінің намысын абыроймен қорғаған бірқатар жастар жүлделі орынды иеленді. Бүгін марапат алып мерейі үстем болғандар қатарында олар да бар.
– Былтыр республикалық форумда үздіктер қатарынан көріндік. Артқан сенімнің үдесінен шыққан жүлдегерлерді филиал директоры қабылдап, алғыс білдірді. Алғыс хатпен марапатталған жас теміржолшыларға филиалдың кәсіподақ комитеті атынан сыйлықтар тапсырды, – дейді Жамбыл бөлімшесі қауіпсіздік бөлімінің басшысы Медет Ұшақбаев.
