Ұйым төрағасы ауысты
«Қазақстан теміржолшысы» газетінің тілшісі
«AMANAT» партиясының «ҚТЖ» ҰК» АҚ бойынша бастауыш ұйымының жаңа төрағасы сайланды.
Осыған орай компанияда партияның Есіл ауданы бойынша филиалының ұйымдастыруымен өткен бастауын партия бюросының отырысы өтті. Партияның Астана қалалық филиалының атқарушы хатшысы Мұхаммед Болысбек пен осы ауданның партия ұйымының атқарушы хатшысы Санира Жүсіпова қатысқан жиынның күн тәртібінде партия ұйымының бірінші тоқсандағы жұмысы туралы есебі де тыңдалды. Бұл туралы бұған дейінгі бастауыш ұйым төрағасы болған Батыр Котырев баяндады. Оның айтуынша, қазіргі таңда ҚТЖ бастауыш партия ұйымының 900 мүшесі бар. Биыл теміржолшылардың партия ұйымы тағы 14 адамға толыққан. Осы жылы бастауыш партия ұйымында онлайн-қоғамдық қабылдау ашылып, QR-коды бар ақпараттық баннер қоғамдық орындарға ілінген.
«Бұл бастама партияның елорда филиалымен арадағы өзара іс-қимылды нығайтып, негізгі өтінімдер мен өтінім берушілердің базасын қалыптастыруға ықпал етеді. Теміржолдағы партия өкілдері кез келген мәселе бойынша көмекке онлайн хабарласа алады», – деді Б. Котырев.
Одан әрі компанияның бас инженері Батыра Котыревтің «ҚТЖ» ҰК» АҚ омбудсмені болып тағайындалуына байланысты оның ешбір партияда мүше бола алмайтындығы назарға алынып, оның орнына бірауыздан компанияның әлеуметтік саясат департаментінің бас менеджері Ақмарал Байғабылова сайланды. Отырыста партияның Астана қалалық филиалы өкілдері Батыр Котыревтің ұйым жұмысын дамытуға қосқан үлесін атап өтіп, Алғыс хатпен марапаттады.
