«Жас темір» жалғасын тапты

«ҚТЖ» ҰК» АҚ-ның жас мамандарды дамытуға арналған «Жас темір» бағдарламасы биыл екінші рет жалғасын тапты. Бағдарлама теміржол саласына білікті мамандар дайындауға бағытталған. Кеше бағдарламаның биылғы кезеңінің қатысушыларына арнап компания жұмысын таныстыру жиыны өтті.  

Қатысатын жастар ЖОО-ның теміржол мамандықтары бойынша түлектерінің арасынан іріктелетін бағдарламаның бірінші кезеңі 2022 жылы өткен болатын.  

Бағдарлама қатысушылары компания тарапынан жатақханамен қамтамасыз етіліп, әрқайсысына жеке даму жоспары бекітіледі. Оларға өздері қабылданған мекемеден тәлімгерлер бекітіліп, сол ұстаздарының жетектеуімен жас мамандар білімін тәжірибемен ұштастырады. 5 айға созылатын әр ротация алдында олар оқытылып, негізгі мамандық бойынша сол ротациялардан өтіп шығады және бағдарлама аясында жұмыс істеген 1,5 жылда оларға ай сайын жалақы төленеді.  

Іріктелген жастардың қадамына сәттілік тілеген компанияның Адами ресурстарды басқару департаментінің директоры Әлихан Қыраубаев болашақ теміржолшылардың тәжірибесін қалыптастырып, біліктілігін арттыруына көмектесуге қашан да дайын екендіктерін жеткізді. «ҚТЖ» ҰК» АҚ «Көпфункционалды қызмет көрсету орталығы» филиалының таланттарды басқару бойынша функционалды бағытының бас менеджері Нұргүл Өтеулиева компанияның Қазақстандағы ірі жұмыс беруші ретіндегі рөлі, қызмет бағыты мен мақсат-міндеттері, беделі мен басымдықтары және құндылықтарын арнайы слайд арқылы таныстырды. Сонымен қатар «ҚТЖ» ҰК» АҚ Адами ресурстарды басқару департаментінің HR бизнес-серіктесі Динара Сәрсембаева да жастардың қадамына сәттілік тілеп, жылы лебіз білдірді.  

– Алматыда теміржолдың жүктерді тасымалдау және ұйымдастыру мамандығы бойынша жоғары оқу орнында оқып, биыл диплом алғанмын. Аталған бағдарлама туралы ҚТЖ-ның сайтынан танысып, бақ сынап көрейін дедім. Анкета толтырып, берілген сұрақтарға жауап бердім, әңгімелесуге бардым. Сөйтіп барлық кезеңінен толық өтіп, бүгін міне бағдарламаны бастау үшін Астанаға келіп қалдық. Мені «ҚТЖ-Жүк тасымалы» ЖШС бойынша жұмыстарға бөлді. Оқуын енді тәмамдап, қызметке кіріскелі тұрған біз сияқты жастарды қолдағаны үшін ҚТЖ компаниясына алғысымды айтқым  келеді, – дейді Жезқазғаннан келген  бағдарлама қатысушысы Бибарыс Елеусізов.