«Магистраль Аwards-2024» жүлдегерлері анықталды

Кеше Астанада Еуразия көлік кешені көшбасшыларына арналған «МАГИСТРАЛЬ AWARDS-2024» жүлдесін анықтау рәсімі өтті. Маңызды жиында халықаралық көлік және логистика саласындағы компаниялар, соның ішінде «ҚТЖ» ҰК» АҚ қызметкерлері мен кәсіпорындары да беделді жүлде лауреаттары атанды.

Салалық жүлдені «ҚТЖ» ҰК» АҚ, «TLK Media», ҚР Көлік министрлігі, ҚР Мәдениет және ақпарат министрлігі, «KAZLOGISTICS» көлікшілер одағы және Еуразия экономикалық комиссиясының қолдауымен Н.Исингариннің көлік бастамаларын қолдау қоры ұйымдастырды. Биыл салалық байқауға 5 мемлекеттен 100-ден аса қатысушылар өтінім берген, олардың ішінде жетекші теміржол, порт, логистикалық компаниялар бар.  

Жиынды ҚР Көлік вице-министрі Мақсат Қалиақпаров ашып, көлік және логистика саласындағы жетістіктерді айтып өтіп, соған үлес қосқан майталмандарды анықтауда бұл жүлденің орны бөлек екенін жеткізді. Алғашқы аталым – «Еуразия көлік каркасын институционалды дамытуға қосқан үлесі үшін» номинациясымен «ҚТЖ» ҰК» АҚ Басқарма төрағасының логистика жөніндегі орынбасары Ерлан Қойшыбаев марапатталды. Көп жылдан бері Қазақстанның көлік-логистика саласында кәсіби біліктілігі мен қызметіне адалдығын танытып келе жатқан оның жұмысы халықаралық көлік дәліздерінің басты бөлігі ретінде Қазақстанның тұрақты институционалдық негізін құру және орнын бекітуге бағытталған. Е.Қойшыбаевтың араласуымен сәтті жүзеге асырылған жобалардың қатарында Қорғас пен Сианьдағы құрғақ порттарды, Ляньюньгандағы, Каспий теңізіндегі терминал қызметін атауға болады. Сонымен қатар Еуразия құрлығы мен Қазақстан арқылы контейнерлік транзиттің миллиондық көрсеткішіне қол жеткізуге атсалысуы да атап өтілді.  

Келесі «Транспорт Профи» аталымы бойынша лауреат атанғандар қатарында «KTZ Express» АҚ ІТ департаментінің директоры Ғизат Әмірғали және «ҚТЖ» ҰК» АҚ Интеграция және халықаралық ынтымақтастық департаментінің топ басшысы Айман Ибраева болды. Ал «Көлік басқару шеберлігі» аталымы бойынша «Құрық порты» ЖШС бас директоры Серік Ахметов марапатталды. «Сәтті старт» аталымының дипломдары «Алят порты интермодальды жүк терминалы» жобасы үшін «Кедентранссервис» АҚ-ға, «Ақтау теңіз сауда порты базасындағы контейнерлік хаб құрылысы» жобасы үшін Ақтау порты ұжымына берілді. «Жылдың үздік жобасы» аталымы бойынша еңбегі еленгендер қатарында «Сиань қаласындағы көлік-логистикалық орталығы» жобасы үшін ҚТЖ компаниясының аты тағы аталды. «Цифрлық логистика көшбасшысы» аталымының лауреаты болуға лайық деп танылғандар арасында «Бірыңғай цифрлық терезе» жобасы үшін «KTZ Express» АҚ болды.  

Мемлекет басшысының 2025 жылды «Жұмысшы мамандықтары жылы» деп жариялауына байланысты «Халық таңдауы» жүлдесімен «Автотізбекті тіркеу қызметі бар тренажер» жобасы үшін Қостанай вагон пайдалану депосының вагон қараушысы Мұрат Ерманов марапатталды.  

«Көлік кешеніндегі үздік HR-бастамалар» аталымы бойынша «Теміржолшыларды моральдық ынталандыру жүйесін дамыту» жобасымен ҚТЖ тағы жүлделі болды. Сондай-ақ «Тиімді көлік шешімдерін іске асырғаны үшін» аталымы бойынша марапат ҚТЖ-ның техникалық орталығының директоры Азамат Жангелдіге берілді.