«Үздік ойыншы» – пойыз құрастырушы

Көңілді және тапқырлар ойынында жарқырап көрінетін маңғыстаулық пойыз құрастырушы Азамат Абибулда биыл «Үздік ойыншы» номинациясына ие болды. Екі жылдан бері түбек теміржолында пойыз құрастырушы болып еңбек етіп келе жатқан Азаматтың сахнадағы өнері мен актерлік шеберлігіне көрермендер де, қазылар алқасы да тәнті болды.

«Маңғыстау.кз» командасы құрамында өнер көрсетіп жүрген Азамат – теміржолшылар отбасынан шыққан. Әкесі вагон қараушы болып еңбек етеді.  

– Пойыз құрастырушы болып жұмыс істегеніме аз ғана уақыт болды, бірақ осы аралықта өз мамандығымның қаншалықты маңызды әрі жауапты екенін түсіндім. Ал жайдарманда ойнау – сүйікті хоббиім, 7-сыныптан бері қатысып келемін. Дайындық барысында әзілдерді әріптес жігіттермен бірге отырып жазамыз, құрастырамыз, әрбірінің өзінің мінезіне сай әзілдері бар. Жайдарманшы болу үшін жан-жақты болу керек деп ойлаймын, әрине актерлік қабілет те керек, тапқырлық та қажет. Сахна мен үшін киелі жер, ол жерге шыққан адам міндетті түрде қобалжиды. Дегенмен бойыңда көпшілікті қарата алатын өнерің болса, халықтың ықыласы қанаттандырып жібереді, – дейді Азамат.  

Азаматтың анасы – музыкант, домбырадан сабақ береді, демек өнер оған анасынан дарыған десе болады. Көпбалалы отбасынан шыққан кейіпкеріміз отбасылы, Асылтас есімді қыздың әкесі.  

– Бұл форумға былтыр да қатысқанмын. Биыл да келдік. Өте жоғары деңгейде өтті. Бәрінің көңілінен шықты. Түрлі салада білім алдық, тәжірибе жинадық. Өмірімде тағы да жаңа достар пайда болды. Жас қызметкерлердің дамуына осындай жағдай жасап отырған ҚТЖ басшылығына алғысымыз шексіз, – дейді Азамат.