Салауатты сөз – тіл абыройы

Дұрыс сөйлей білеміз бе? Қазақ тілінде сөйлеу клубының кезекті отырысы «ҚТЖ» ҰК» АҚ қызметкерлерінің тілдік қолданысында ауызша және жазбаша жиі кездесетін қателерді жою, тіл мәдениетін сақтай отырып сөйлеу дағдысын қалыптастыру, қазақ тілінің емлесін дұрыс қолдауға үндеген «Салауатты сөз – тіл абыройы» тақырыбындағы шеберлік сабағына арналды.  

Компанияның «Көпфункционалды қызмет көрсету орталығы» филиалы Мемлекеттік тілді дамыту секторы ұйымдастырған қазақ тілінде сөйлеу клубының бұл отырысы ақиық ақын М.Мақатаевтың туған күніне арналды. Теміржол қызметкерлері ақынның өлеңдерін оқып, оның сөзіне жазылған әндерді орындады. Сондай-ақ ақынның шығармашылығы мен өміріне арналған сұрақтарға жауап берді.  

– Байқап отырсақ, қатарымыз отырыс сайын көбейіп келеді. Бұл отырысты айына бір рет өткіземіз деп шешім қабылдадық. Қазақ тілінің қолданыс аясын кеңейте түсу үшін алдымен тілдік орта қажет. 26 ақпанда осы компания ғимаратында Ш.Шаяхметов атындағы «Тіл – қазына» ұлттық ғылыми-практикалық орталығының өкілдерімен кездесу өтеді. Сол жиынға баршаңызды шақырамыз, – деді сектор басшысы Ербол Тоқтағазы.  

Түстен кейін өткен шеберлік сабағын «Хабар» телеарнасының жаңалықтар жүргізушісі, «Халықтың сүйіктісі-2024» Ұлттық сыйлығының «Үздік тележүргізуші»  премиясының жеңімпазы Мөлдір Доспаева жүргізді. Көрермендерге тіл жанашыры ретінде танылып жүрген журналист ҚТЖ-ның және жалпы басқа да сайттарда кездесетін теміржол жаңалықтарындағы қате сөйлемдерді слайдтар арқылы көрсетіп, оның дұрыс жазылу нұсқасын айтып берді.  

 – Мемлекеттік тілдің қолдану аясын кеңейту мақсатында шеберлік сабағын өткізуді ұлттық компаниялар арасында бірінші болып сұраған – ҚТЖ компаниясы. Жалпы кез келген адам қай тілде болсын сауатты сөйлегісі келеді. Адамды алғаш көргенде сыртқы киімі мен түріне қарап бағалаймыз, бірақ ол екі сөздің басын құрай алмайтынына көз жеткізсек, бұған дейінгі сыртқы келбетінің сәнділігі маңызды болмай қалады. Сондықтан әр сөзді өз орнымен қолданудың маңызы зор. Әсіресе біз соңғы уақытта қазақ тілінің өзіндік құнары мен мағынасын, мәнін бұзып, калька сөздерге үйір болып барамыз. Менің міндетім – сол байқаған кемшіліктерді түзету, сол жолда білгенімді сіздермен бөлісу, – деді М.Доспаева.