ҚТЖ-да Наурызнама онкүндігі өтуде
«Қазақстан теміржолшысы» газетінің тілшісі
Ұлыстың ұлы күні әз Наурыз мейра - мын Қазақстан темір жолшылары ерекше көңіл-күймен атап өтуде. Астанада Ұлттық компанияның бас ғимаратының үлкен фойесінде ұлттық нақышта безендірілген киіз үй тігіліп, арнайы фотоалаң жабдықталды.
Компанияның барлық құрылымдық бөлімшелері мен еншілес ұйымдары Наурызнама онкүндігінің әр күнінде ұлттық салт-дәстүрден тұратын іс-шаралар өткізді. 14 наурыз күні «Көрісу» күнінен бастап «Қайырымдылық», «Мәдениет және ұлттық салт-дәстүр», «Шаңырақ», «Ұлттық киім», «Жаңару», «Ұлттық спорт», «Ынтымақ», «Жыл басы» және «Тазару» күндерінің бәрінде де теміржолшылар қауымы іс-шаралардан тыс қалмай, Ұлыс күнінің өз деңгейінде өтуіне атсалысуда.
ҚТЖ-ның барлық филиалдарында «Наурызнама» онкүндігі аясында этно-ауылдарды безендіру, ұлттық тағамдардан дәм татқызу және сала ардагерлерін құттықтау сияқты түрлі іс-шаралар өтуде. Теміржолшылар қайырымдылық акцияларын да ұйымдастырып, экологиялық бастамалар аясында «Ағаш отырғыз!», «Аумақты тазала!», «Жануарларға арналған баспанаға көмек» акцияларын өткізуде.
«Ұлттық спорт – ұлт келбеті» спорттық іс-шаралар аясында компания қызметкерлері ұлттық спорт түрлері бойынша жарыстарға қатысуда. Ал бүгін – 21 наурыз күні елорданың «Нұрлы жол» вокзал-кешені аумағында тоғыз ақ шаңқан үй тізіліп, ҚТЖ және оның филиалдары көпшілікке наурызнама мерекелік бағдарламасын ұсынып, наурыз көже мен бауырсақ таратуда. Ұлыс оң болсын!
