Транзит әлеуетіне арналған конференция өтеді
«Қазақстан теміржолшысы» газетінің тілшісі
Биыл 17-18 маусымда Алматыда жылдағыдай «Қазақстандық көлік-логистикалық форумы-2025: транзиттік әлеует және инфрақұрылым» тақырыбында конференция өтеді.
Жиында Орталық Азияның көлік үдерісінде маңызды рөл ойнайтын Қазақстанның көлік инфрақұрылымын дамыту перспективалары мен соңғы жетістіктері ұсынылады. Астық, тау-металлургия, мұнай өнімдері, тыңайтқыштарды қоса алғанда Қазақстанның негізгі экспорттық бағыттары мен олардың көлік инфрақұрылымын дамытуға әсері талқыланады. Айта кетсек, бұл конференцияға былтыр 15 елден 130-дан астам компания қатысқан болатын. Іс-шараның алғашқы күнінде көрме ұйымдастырылып, форум өтсе, екінші күні логистикалық кәсіпорындарға экскурсия ұйымдастырылады. Сондай-ақ Қазақстанның көлік инфрақұрылымы, қазіргі жағдайы мен даму перспективалары, ТХКБ дамуы, халықаралық теміржол тасымалдары, жаңа қызметтері мен бағыттары, Қазақстандағы теміржол тасымалы бойынша тариф саясаты, Қытайдан жаңа сауда бағдарлары құрылысының геосаяси және экономикалық аспектілері сөз болмақ.
Конференцияға сонымен қатар астық, көмір, кокс, тыңайтқыштар, мұнай, болат, металлургиялық шикізат және болаттан жасалған дайын бұйымдар, құрылыс материалдары және т. б. өндірушілер, трейдерлер және тұтынушылар, жүк тасымалдау компаниялары: кеме иелері – операторлар, агенттер, брокерлер, теміржол операторлары, контейнер желілері, кешенді логистикалық қызметтерді жеткізушілер де қатысады. Оған қоса порттар мен терминалдар, стивидорлық компаниялар, экспорттаушылар, импорттаушылар, порт жабдықтарын жеткізушілер, теңіз саудасын бақылауға қатысатын кеңесшілер, қаржы институттары: инвестициялық банктер / инфрақұрылымдық қорлар, қауымдастықтар мен мемлекеттік органдар өкілдері де келеді деп күтіліп отыр.