Теміржол тарихына саяхат: студенттерге арналған ерекше экскурсия
«Қазақстан теміржолшысы» газетінің тілшісі
Қазіргі таңда елордада «Astana Art Group» ЖШС мен Астана қаласы әкімдігінің «Astana tourism» туризмді дамыту орталығы бірігіп, «Астана қаласындағы 1 курс студенттері мен 7-11 сынып оқушылары үшін кәсіби бағдарлану экскурсиялары» әлеуметтік жобасын жүзеге асыруда.
Осыған орай ҚТЖ бас ғимаратындағы музейде Астанадағы М.Тынышпаев атындағы ALT көлік колледжінің 50-ге жуық студентіне экскурсия ұйымдастырылды. Музей меңгерушісі Ақмарал Молдашева студенттерге Қазақстан теміржолының тарихымен таныстырып, сұрақтарына жауап берді. Жастарды мұражайдағы теміржолшылардың бұрынғы формалары, олардың иелері кімдер болғаны туралы ақпараттар қызықтырды. Сонымен қатар бұрын теміржолшылар қолданған ескі аппараттар туралы да қызықты мәліметтер берілді. Экскурсия барысында студенттер арасында теміржол туралы викториналық сұрақ ойыны да ұйымдастырылды. Оларға музейдегі жәдігерлердің жылдарына, қазақтан шыққан тұңғыш инженер Мұхамеджан Тынышпаевтың өміріне және Түрксіб теміржолы жайында сауалдар қойылып, дұрыс жауап бергендерге «Қазкөліккәсіп» ҚБ атынан бағалы сыйлықтар табысталды. Аталған колледжде «Тасымалды ұйымдастыру» мамандығы бойынша білім алатын студенттер болашақта компанияда өз кәсіптері бойынша жұмыс істеуге ынталы екенін жеткізді.
Айта кетейік, 2010 жылдары құрылған музейде бүгінде Қазақстан теміржолының тарихына, оның қалыптасу жылдары мен дамуына қатысты 1000-нан астам деректер мен жәдігерлер бар.