Астанада теміржол саласына кадр даярлау мен жұмыспен қамту жолдары қаралды

Астана қаласы әкімдігінің Көлік және коммуникация жоғары колледжі базасында «Теміржол мамандықтарының болашағы: кадрларды даярлау және жұмыспен қамту» тақырыбында форсайт-сессия өтті.

Жұмысшы мамандықтар жылына орай ұйымдастырылып, көлік саласын дамытуға бағытталған іс-шара стратегиялық пікір алаңына айналды.  

Сессияның басты мақсаты – теміржол саласындағы мамандарды даярлау мен оларды жұмысқа орналастыруға қатысты болашақтың негізгі үдерістері мен сын-қатерлерін анықтау. Сонымен қатар білім беру ұйымдары, мемлекеттік басқару органдары мен бизнес құрылымдары үшін стратегиялық ұсынымдар әзірлеу. Іс-шара аясында колледждер мен теміржол саласындағы жетекші компаниялар арасындағы әріптестік байланыстарды нығайту да басты назарда болды.  

Үш колледждің қатысуымен кәсіби талқылау өтті. Форсайт-сессия жұмысына Астана қаласының үш жетекші колледжі қатысты. Олар: Астана қаласы әкімдігінің Көлік және коммуникация жоғары колледжі, Астана қаласы әкімдігінің Техникалық колледжі, Тынышбаев атындағы көлік және коммуникация колледжі.  

Іс-шара барысында саланың жетекші мамандары өз ойларымен бөлісті. «ҚТЖ» ҰК» АҚ Адами ресурстарды басқару департаментінің HR-бизнес серіктесі Алма Тұрарқызы: «Бұл іс-шара болашақ теміржолшылар үшін аса маңызды. Біз студенттердің дайындығын, көзқарасын білдік. Қандай кедергілер бар, оларды қалай шешуге болады, соның бәрін бірге сараладық. Теміржол – ел экономикасының тірегі. Теміржолшы – болашағы зор мамандық. Жастарды осы салаға бетбұрыс жасап, аянбай еңбек етуге шақырамын», – деп пікір білдірді.  

Колледж студенттері мен әлеуметтік серіктестер кәсіби мамандықтарға қатысты өзекті сұрақтарды бірге талқылады. Еңбек нарығындағы сұраныс, жаңа өндірістік талаптар мен технологиялық өзгерістерге сәйкес оқу бағдарламаларын бейімдеу мәселелері қозғалды. Әр оқу орны өз мамандықтарына сай қойылған сұрақтарға жауап беріп, практикалық шешімдер ұсынды. Бұл өзара пікір алмасу мен кәсіби бағдар беруді күшейтіп, өндірістік процестердің өзара байланысын нақтылауға мүмкіндік берді.